【點新聞報道】「華星唱片」55周年，孕育無數歌神天后，講到90年代經典，必然是梁漢文、陳奕迅、楊千嬅組成的「華星三寶」。他們在節目《星塵55》細數當年在華星大家庭成長點滴，三人一碰面就傾到雞啄唔斷，全場笑聲不斷。
梁漢文（Edmond）1989年參加「第8屆新秀歌唱大賽」出道，而陳奕迅（Eason）同楊千嬅就喺1995年「第14屆新秀歌唱大賽」分別奪冠同入三強，齊齊加入華星。雖然參賽年份相隔五屆，但三人年紀相若，加上90年代正是事業搏殺期，經常一齊出活動，漸漸被人封為「華星三寶」。
他們第一次見面，是1995年Eason同千嬅新秀賽後的慶功派對，當時同場還有師兄師姐Edmond、許志安、鄭秀文、海俊傑、張崇基、張崇德等，場面熱鬧。之後三人一齊坐同一架保姆車周圍去宣傳，Eason話：「千嬅最慘，因為佢自己要化妝，要早兩個鐘起身，公司車第一個接佢，再去接Edmond，佢哋喺九龍，最後過海接我，因為華星喺灣仔。收工就放低我先，千嬅最後先落車，返到去仲要落妝，即係最遲先有得抖，真係慘。」千嬅笑住話：「我咁慘㗎？不過嗰陣唔會諗蝕底，覺得有工開就好開心！」
Eason又爆：「梁漢文出名在車上食嘢，但杯奶茶從來唔會倒瀉，技術好高，落糖、攪拌全部喺車做齊！」Edmond即場示範：「轉彎、剎車都完全冇問題！」
講到「華星三寶」這稱號，原來是當年高層吳雨見到街邊小食「煎釀三寶」得來的靈感。Edmond話：「嗰排我哋差唔多時間plug歌，成日一齊上節目宣傳，做做吓就醞釀咗首《大激想》出嚟！」千嬅話：「我哋好犀利㗎，咩舞都跳過，連鳳陽花鼓都跳過！」Eason同Edmond即刻手舞足蹈，千嬅喺隔籬笑：「而家啲關節唔聽話，跳唔到喇！」
Edmond由1992年同師兄師姐合唱《火熱動感LaLaLa》，到1993年《愛情傻戀LaLaLa》，到1998年「升呢」做師兄，帶住Eason同千嬅合唱可口可樂廣告歌《大激想》，延續華星傳承精神。Eason同Edmond最難忘是拍《大激想》廣告當晚，發現自己上了雜誌封面，Eason話：「嗰晚喺西環通宵拍嘢，千嬅埋位，我同Edmond踎喺電車站無聊揭雜誌，見到寫我哋『不和』，真係笑死！」
Edmond總結：「華星有一種獨特氣氛，好似一間音樂學校，好有系統，由歌唱比賽開始，多年嚟幫歌手製作好多歌、推出好多唱片，令大家有成績，一代一代傳落去，歌手之間嘅感情亦維繫得好好。」Eason補充：「其實幕後都係咁，大家好似一班舊同學咁。」
（點新聞特約記者陳惠芳報道）
收藏
取消收藏
分享
