文/稀思路
一個人如果用盡運氣，有冇跡象可尋？筆者覺得係有嘅，首先係身邊會有好多唔順暢嘅人同事，跟住會發生不幸嘅事情。最近，喺七國集團（G7）峰會，就發生一件好罕有嘅事，有法國傳媒爆料，話美國總統特朗普同日本首相高市早苗，竟然因為「珍珠港事件」而爆發爭執，仲要其他國家嘅領袖出面調停；過去，唔少西方國家領袖都會忍特朗普，高市早苗咁戰鬥格，唔通佢覺得自己可以同美國平起平坐？
呢單嘢，其實係有啲滑稽，特朗普向來鍾意認叻，話說特朗普喺G7期間，向各國領袖談及美國對伊朗採取嘅軍事行動時，就形容行動係一次「成功嘅偷襲」，仲將行動同當年日本偷襲珍珠港作出比較，於是就激嬲咗高市早苗，據報雙方有口角，氣氛一度緊張，要由其他領袖勸和，爭吵先平息落嚟。
國家領袖喺重要場合有口角，好少見，由「小弟弟」反擊「老大哥」，就更加少見，喺特朗普眼中，對住日本，理所當然地擺出一副「串你囉」嘅姿態，而高市早苗自以為強勢，但事實上，喺美國面前日本一向都要低頭，就如日本國內，都有唔少美軍基地，受美國「關照」，所以特朗普更係肆無忌憚。
回到文章嘅主題，點解筆者話高市早苗可能運氣「到頭」？佢同特朗普爭拗，係一段插曲，真正重要嘅，係佢喺國內嘅民望又創新低！根據共同社喺20日到21日進行嘅全國電話民調，高市早苗嘅內閣支持度跌至55.8%，係上任首相以來嘅新低，比上次5月民調更係跌咗超過5%，不支持度則接近28%，數字比上次亦增加咗。
民望跌完又跌，當然係有原因啦，因為日圓貶值、霍爾木茲海峽危機等，令日本物價高企，加上高市早苗同親信又捲入選舉時利用AI內容抹黑對手嘅醜聞，高市早苗嘅民望就「一路跌、一路跌」，筆者覺得，高市早苗憑咩形象上台係一回事，但內政外交搞到一鑊粥咁，日本民眾都唔係傻嘅。
如果讀者們留意下西方國家，唔少國家領袖都鍾意用外交、向外強硬嚟爭取民眾支持，但呢招有個弊端，就係透過強硬嘅對外手段，可以喺短期內爭取民望，但搞唔掂國內問題，遲早一樣死！
高市早苗以極右甚至新型軍國主義嘅姿勢示人，聲稱「台灣有事即係日本有事」，但依家有事嘅，似乎係佢自己多啲。同中國交惡，高市早苗可以不以為然，但唔計日本平常同中國嘅經貿交往，日本冇足夠稀土，國內重要工業已經叫苦連天，所以話，從政如果只係玩「假大空」，對外表現強硬，但內政搞到一塌糊塗，高市政府話帶領民眾「走上月球」都冇用啦！
（本文為作者觀點，不代表本媒體立場）
收藏
取消收藏
分享
