文/稀思路
如果讀者們有留意國際新聞，每日最常留意到嘅，大概就係美國、以色列、巴勒斯坦同伊朗，美國之前同伊朗一直拉鋸，時打、時停、時偷襲，直到近日終於達成停戰協議，而喺呢個過程當中，其實中國都有出力，中共中央政治局委員、外交部長王毅16日晚同巴基斯坦副總理兼外長達爾通電話。後者就通報了伊朗與美國達成第一階段諒解備忘錄情況，感謝中方在過去幾個月同巴方保持密切溝通，對巴方斡旋努力予以寶貴支持。筆者就認為，喺推動世界和平嘅進程上，話中國一直發揮住重要嘅穩定作用，講法十分貼切，也符合中國人愛好和平嘅文化傳統。
據了解，王毅祝賀巴基斯坦推動伊美達成第一階段諒解備忘錄，強調為和平而努力是包括中巴在內所有國家應盡的國際責任。戰事發生以來，中方同各方開展接觸，積極止戰促和，從一開始就力挺巴方，向各方強調巴方係值得信賴斡旋者，也以自己方式分別同伊朗與美國進行工作。王毅仲提到，目前的共識遠非終點，而是新的起點，中東海灣地區持久和平仍需各方不懈努力。
如果話巴方感謝中國係基於兩國情誼，筆者想指出，美國總統特朗普一樣有感謝中國，佢話向幫助佢同伊朗達成初步停火協議嘅人表示感謝，讚揚咗兩個國家嘅領導人，就係中國同俄羅斯嘅領導人。特朗普指出，兩位領導人幫助美國同伊朗敲定協議，或者至少為此創造條件。
以前嘅美國，可以話係隻手遮天，唔鍾意邊個弱小國家，出兵、推翻政權係「平常事」，但今次突襲伊朗、發動戰爭，明顯係碰上硬釘，伊朗雖然軍力不如美國，但一次又一次反擊，而且憑住極強嘅耐力，結果「軍事上打唔贏美國，就用韌力拖死美國」；美國一直攻，伊朗一直還擊，最終美國覺得打落去都唔着數，所以選擇和談。喺呢個過程，中國始終展現大國風範，推動和平，呢種和平形象，難怪唔少國家依家對中國嘅好感，都開始超越美國。
容許筆者講少少美伊協議嘅內容，包括「美國與伊朗承諾尊重彼此主權與領土完整，並避免干涉對方內部事務」、「美國承諾與區域合作夥伴共同制定明確且雙方均同意的計劃，提供至少3000億美元」等，呢啲協議係咪全部真確，相信之後會更清楚，但有唔少評論指出，今次贏家其實係伊朗，因為作出讓步嘅，似乎係美國比較多。既然如此，賠了夫人又折兵，咁當初美國攻打伊朗，係為什麼呢？
經此一役，世人所見到嘅，再唔係咩無敵軍隊，而係一個中等國家，即使面對軍力不對稱嘅美國，原來都有方法可以應對。不過，伊朗最終同美國係咪達成最後嘅和平協議，筆者仲有一定保留，有兩大原因，第一係特朗普個性始終善變，如果雙方再傾時唔啱佢心意，佢仲係有可能再突襲伊朗；第二則係，停戰未必有利於好戰嘅以色列總理內塔尼亞胡，以色列仲可能會搵機會重新挑起戰事。事件發展如何仲有待觀察，但整件事上，邊個係搞事派大國，邊個係願意擔起國際責任、推動和平嘅大國，全世界都睇得一清二楚。
（本文為作者觀點，不代表本媒體立場）
收藏
取消收藏
分享
