【點新聞報道】周家怡主演電影《媽樣年華》近日入選「上海國際電影節展映單元」，日前她同導演一齊現身電影節，同內地觀眾見面。
對於今次入圍，家怡直言好開心：「見到觀眾反應咁好，我同導演都好滿足。最希望可以去多啲唔同嘅電影節，等更多人睇到我哋香港嘅作品。」她在片中演媽媽角色，家怡大笑話：「其實已經唔係第一次，做咗好幾年媽媽，我都諗緊係咪好快要做阿嫲，哈哈。」她指今次最大挑戰是要跳鋼管舞：「以前從未試過，過程都幾辛苦，但係好好嘅體驗，好有成功感。」不過練習期間家怡試過骨裂，要休息個半月，但為免耽誤劇組，未完全好返就即刻重新投入訓練：「搵咗Personal Trainer幫我操，用盡各種方法喺最短時間內build up肌肉去應付，雖然有壓力，但都幾好玩。」
談到戲中最感動一幕，家怡話：「首先係自己成就解鎖。之前香港試映，現場有好多媽媽觀眾睇到眼濕濕，見到佢哋咁有共鳴，覺得要『搵返自己』，我好感動。當然，都有唔係媽媽嘅觀眾覺得好啱睇，因為好多時候，我哋都會圍繞住其他人付出，而忘記咗自己。」
她還分享同媽咪的難忘事：「前幾年媽咪隻腳行得唔好，我朝朝捉佢去跑步，帶佢睇物理治療師，跑完步再帶佢食嘢，等佢開心啲。嗰陣佢要揸拐杖，而家唔使啦，間中都仲會跑步。另外一次同朋友帶各自爸爸媽媽去日本旅行，我哋幫佢哋拍咗隻《Long Vacation》MV，前一晚仲四圍張羅道具同化妝品，見到各位爸爸媽媽對製作好認真投入，好搞笑。」
（點新聞特約記者陳惠芳報道）
收藏
取消收藏
分享
