文/稀思路
四年一度嘅世界盃又快將開鑼，除咗係球迷盛事，唔少平時冇睇開波嘅人，都會揀一啲「大戰」去睇下，如果喺香港想睇波，就要畀錢攞咗播映權嘅電視台；如果想去現場睇波，稀思路覺得非常唔容易，因為睇新聞睇到，已經有球迷「賣樓去睇波」，亦有聲音指今屆門票貴到離晒譜，點解會咁？係咪同美國有份主辦有關？
筆者近日喺網上睇到單新聞，話說一位超級球迷米爾恩（Andy Milne），就表示自己正出售自己第二套物業，以「集資」去睇今屆世界盃，呢位英國球迷，喺上屆世界盃就因為身穿英格蘭波衫、手持複製世界盃嘅獎盃嘅相片，而令自己一舉成名。佢打算出售喺於柴郡（Cheshire）嘅房產，值300幾萬港元，真係為咗睇波，你（米爾恩）可以去到幾盡。
如果米爾恩只係一個極端例子，其實其他消息亦指向，今屆去現場睇世界盃，係真係好貴，有阿根廷支持者就指出，上屆卡塔爾世界盃，用咗接近1500美元去買門票；但到咗今屆，已經花咗近7000美元去買，呢位阿根廷球迷表示，佢明白足球都係一門生意，但係今屆嘅做法太過火，根本就係盛大嘅「商業化」世界盃，有傳媒就以「歷來最昂貴的世界盃」去形容賽事。
除咗門票，要去睇世界盃，例如去美國睇，基本上機票同酒店，全部都係「食貴價」，但仲有一點難搞嘅，就係簽證！因為據報，今屆世界盃就有超過四分之一參賽國球迷面臨主辦方之一美國嘅入境禁令，或者係難以取得旅遊簽證（甚至連伊朗代表團成員都係）。呢啲球迷包括來自非洲、中東以及拉丁美洲等國家，佢哋都抱怨簽證難等同變相歧視，話「這不是為我們準備的世界盃」。
話分轉頭，今次世界盃由美國、加拿大同墨西哥主辦，其中又以喺美國有較多賽事，唔少球迷要捧愛隊場，自然亦要辦美國簽證。假設門票價格係由國際足聯（FIFA）分配同定價，門票貴嗰部分就唔關美國事嘅；但一個國家要搞世界盃，又對部分國家嘅市民喺簽證上設置障礙，咁一個應該普天同慶嘅體育盛事，其實似係令到普天同「慶」（憤怒）先真喎。
筆者寫世界盃，當然唔會純粹以娛樂角度出發，美國作為主辦國之一，喺入境、住宿等安排上做成點，讀者們應該要知道。再講深一點，美、墨、加三國合辦世界盃，本來係想促進跨境以至不同方面嘅合作，但時移勢易，依家美國同其他國家關係都唔係咁好，同加拿大仲變成「世仇」，令合辦國之間貌合神離。一次世界盃，本來係一次凝聚全球嘅最佳活動，但賽事未開始，就有部分國家嘅球迷想去睇波而重重受阻，筆者始終覺得，足球無分國界，即使係窮國，佢哋嘅球迷都應該享有同等權利，呢個亦係體育精神嘅其中一種體現方式。
（本文為作者觀點，不代表本媒體立場）
收藏
取消收藏
分享
