文/稀思路
近日，喺美國國會出現咗一次倒戈潮，眾議院通過一項限制總統戰爭權力嘅決議，要求總統特朗普結束對伊朗軍事行動，並喺今後對伊朗採取軍事行動前必須獲得國會授權。今次係眾議院第4次就限制總統戰爭權力嘅決議草案進行表決，亦係眾議院首次通過相關決議。成件事最特別嘅地方，係有4名共和黨籍議員倒戈，同民主黨人一齊投贊成票，點解佢哋要咁做？因為唔少共和黨人都感覺到，自己嘅政治前途，正可能因為特朗普嘅獨斷行為而受到影響。
時間回到本月3日，眾議員通過決議時，表決結果為215票贊成、208票反對，4名共和黨籍眾議員倒戈，美國有線新聞網絡（CNN）等報道，是次決議係一項兩院「共同決議」，已經送呈參議院，預計喺未來兩周半內完成審議；決議必須由參眾兩院一致通過才能生效，共同決議無須總統簽字，總統亦無權否決，但係就不具備法律效力。
決議不具備法律效力，有人可能會覺得，「咁咪即係冇用！」，稀思路想講，呢件事嘅象徵意義，遠大於其實際意義。自從特朗普強勢地再成為美國總統後，除咗美國政府，整個共和黨猶如係佢嘅「私產」一樣，即使有個別例子，都好少共和黨人公開反對特朗普，但今次有共和黨人擺明車馬造反，即係佢哋當中已經有人唔願意相信特朗普，甚至害怕被特朗普拖累。
要深究當中原因，美以伊戰爭仲係相當關鍵，特朗普執意聽以色列嘅建議，突襲伊朗，戰爭帶來嘅衝擊，不止於特朗普嘅個人聲望受損，而係美國國內油價高企、通脹升溫等等，都轉化為特朗普嘅政治壓力；如果所有共和黨人都堅定站在特朗普一邊，即係要一齊承擔美國民眾嘅民怨，之後嘅中期選舉，共和黨自然亦係唔樂觀。
睇返最新民調，美國《國會山報》援引民調機構YouGov嘅數據顯示，特朗普目前支持率僅為35%，不支持率則高達60%，據了解，相關數字係有關機構自2009年開始追蹤美國總統施政表現以來，所錄得嘅最差數字，數字當然亦係特朗普執政期間嘅新低點。由於美以伊戰事持續，筆者估計，特朗普嘅民望仲有下挫空間，可以話係「低處未算低」。
如果讀者們又留意國際新聞，其實除咗中東嘅戰爭，特朗普最近仲試圖再度發起新一輪關稅，依家美國嘅情況，係對外、對內都係咁「亂」。喺筆者執筆時，美國同伊朗一直談判又一直未有實質結果，而且美國又不時襲擊下伊朗，喺戰事走向未明嘅情況下，特朗普政府將會受到更大壓力。美國政客其實都好簡單，你（特朗普）聲勢強，我（美國國會議員）梗係支持你；但係如果你民望低搞到我可能會輸掉議席，部分共和黨人「走得快」，其實係可以理解嘅。
（本文為作者觀點，不代表本媒體立場）
收藏
取消收藏
分享
