【點新聞報道】好人好事！有女網民發文分享阻止騙案的經過，指日前在屯門櫃員機前，見一名阿叔手持厚厚一疊500元現金，開着擴音器聽從電話中「鄉音男」指示準備轉帳。千鈞一髮之際，她與一名姨姨「眼神對望」便心領神會，認為「亞叔可能比人呃錢，我哋決定立即上前阻止，成功保住阿叔血汗錢。
樓主在社交平台threads以「騙案分享」為題發帖，指日前到屯門櫃員機撳錢時，聽到旁邊一名阿叔正開着擴音器與一名帶鄉音男子通話。阿叔在櫃員機前聽從對方指示進行轉帳，「亞叔：我喺櫃員機啦，你教我點過比你；鄉音男：你而家輸入我個號碼xxxxxxxxxx；亞叔：….慢慢地思考中」。
樓主留意到阿叔手持大疊現金準備過，「去到呢度我都望吓望吓呢個亞叔，原來佢拎住一疊好厚嘅$500，估計佢應該係準備入錢俾呢個鄉音男…」。樓主正猶豫是否上前之際，與同樣目擊整個過程的姨姨，兩人一秒對望即心領神會，繼而上前聯手阻止，「當我想走唔走之際，就同門口個姨姨眼神對望，大家都話覺得有懷疑，認為亞叔可能比人呃錢，我地決定立即上前阻止」。
樓主與姨姨上前阻止過數，追問他是否認識電話中要求過數的人，「亞叔，你識唔識叫你過錢個人㗎？」阿叔坦言並不認識對方，「唔識㗎，佢話中移動叫我過數，唔可以門市，要去櫃員機….」。兩人聽罷即向阿叔解釋這是典型電騙手法，「呃人㗎！你唔好比錢佢，你先取消個過數先啦！收番好你D錢先！」
最後，兩人促阿叔停止所有操作並收回整疊現金，「同亞叔做個總結：收番好你果疊現金！唔好再聽佢電話！有咩懷疑要去門市搞，好多嘢都唔會要求你去櫃員機過數㗎！」
事後，她和姨姨兩人握手慶祝，「我同姨姨都好開心，大家互不相識，但握咗個手！」樓主更感嘆「最重要係阻止咗一單騙案，幫咗阿叔繼續袋袋平安」，她形容「好開心今日做咗件好事」。
帖文引起網民熱議，不少網民大讚兩位「女俠」的機警和善心，「樓主好人又熱心，那個阿姨都是，當局者迷，騙徒手法不同，留意身邊隨時出聲，就幫到阿婆阿伯墮入騙局」、「多謝你哋見義勇為，互相守望好重要」、「好人好事！叔叔好彩有你同個呀姨！幸保不失！」。
另有網民分享類似經驗，「我都親眼見過！有個婆婆喺櫃員機度開Speaker撳撳撳講『吓，邊度？你講多次』，聽多兩聽啲內容，之後隔離啲街坊即刻喝住婆婆叫佢唔好呀，收線，呃人㗎！」、「都試過，喺元洲商場。同一個手法…我多事八卦，入完錢聽隔離阿姐俾人呃話電訊公司之類。嚇到她死下死下...我叫她收線都唔肯，後來好彩隔離入咗一個中年叔叔和後生人。一齊勸先肯停落嚟聽我哋講嘢……最後我話你真的擔心可以報警或者直接上門市問，真係唔好亂俾錢人…幫到人真心開心」、「我都遇過。喺ATM有位小姐同我講覺得隔離婆婆俾人呃，於是我同嗰位小姐去留意下婆婆行為。即刻阻止佢，雖然婆婆開頭唔理我哋，仲聽電話入面嘅人講避開我哋……但我哋冇放棄，仲跟着婆婆到其中商戶入面叫職員幫手。我嗰陣心諗可能婆婆都怕我哋係呃人，所以叫埋商場職員幫手報警，先成功阻止到婆婆唔聽個電騙。而家諗返都覺得餓住個肚都值得。（嗰陣已經準備食晚飯，搞完一輪都差唔多夜晚9點）」。
不過，亦有人不幸中招，「曾經喺櫃員機都見過個阿嬸又係聽住電話咁講：我到咗銀行啦，跟住點㩒俾你？（聽到啲對話勁可疑），於是我好心問下佢識唔識對方㗎？？結果個阿嬸勁惡鬧返我轉頭：關你咩事！咁多嘢問，問問問問問，勁無奈最後同銀行職員溝通，但佢已經過咗錢俾人，結果真係被人呃」、「我都見過有個叔叔被呃錢，搭巴士裏面聽到佢打俾個仔，話電訊公司打俾佢，因為上次返大陸佢開咗漫遊上網，唔知連咗去啲咩網站，依家要俾返3萬蚊，如果唔係就cut佢，同埋一個鐘內唔過數會罰多幾千。阿叔表達得唔係好清楚，淨係話大概係知道咁多，就同佢個仔講啱啱過咗3萬蚊，因為阿叔開住Speaker，所以聽到佢個講嘢。佢個仔話：『阿爸你俾人呃咗錢，點解你自己唔去門市問一問，點解你唔打咗電話俾我先？我一陣間同你報警啦』。嗰個叔叔話，我過完錢都覺得有啲唔妥所以打俾你同你講。我聽完之後覺得好心噏，但已經冇嘢可以做到，唉」。
收藏
取消收藏
分享
