【點新聞報道】第五屆「香港潮州節」近日人氣高漲，重量級嘉賓驚喜現身《名人Chill Time 下午茶》環節。昨日（7日）許冠文（Michael）、陳欣健（Philip）到場，席間陳欣健率先向香港觀眾分享大熱潮汕方言電影《給阿嬤的情書》的動人之處，許冠文則拆解賣座電影的成功方程式，更幽默發表「大晒」宣言，引來全場笑聲與掌聲。
許冠文並非潮州人，但他對「架己冷」（自己人）情有獨鍾：「我最鍾意潮州兩樣嘢：潮州女仔最靚，同埋潮州凍魚。潮州魚蛋好有口感，特別有魚味！」陳欣健亦大表認同：「娶潮州女人做老婆，冇得頂！以前我做警察，好多探長都係潮州人，佢哋對我好好。」談及近期熱爆內地、連續多日榮登票房冠軍的潮汕方言電影《給阿嬤的情書》，陳欣健已先睹為快，盛讚作品傑出：「全潮州對白、全部新演員，觀眾依然投入。講述先輩點樣嚟到東南亞、一度失聯、再重新建立友誼，好感動。」
許冠文雖未看《給阿嬤的情書》，但他憑多年影圈經驗斷言：「《阿嬤》咁成功，一定係因為『真情』。所有人物關係描寫都好真、好感人，真到冇人會在意有咩明星、講咩語言，潮州話大晒！」這份「真」的感染力，令人想到他有份參演《破·地獄》。許冠文笑言：「我睇完劇本鍾意到暈，未試過拍一部戲咁感動，仲解答咗我一個最重要問題：人生意義係咩？我問咗一世，原來從何而來、死後去邊都唔重要，最緊要人生在世幾十年，要懂得欣賞沿途風景，盡量令自己欣賞到。」
今日的許冠文已能笑看人生，更幽默發表「大晒」宣言：「尤其而家謝賢少出現，我就『大晒』。『大晒』有咩好處？由細到大我哋都被訓練要尊重長者，但而家大部分人比我年輕，所以我唔使再尊重任何人，想講咩都得，就算講錯，大家都要原諒，因為我『大晒』！」他笑言自己年屆八十多歲，心態卻只得三十幾歲：「最近拍戲，化妝師話我可以暫時頂住『五十尾』，下套戲大家見到我，都只係五十幾歲咋！」
（點新聞特約記者陳惠芳報道）
相關閱讀：
收藏
取消收藏
分享
