文/稀思路
關於國際事務，可能讀者們嘅關注點都喺中東，美國同伊朗停火，但美國又不時襲擊伊朗；中東戰爭「遠在天邊」，其實亞洲都有軍事威脅「近在眼前」，日本自從高市早苗上台後，基本上就係走緊極右、軍國主義復辟嘅路線，之前一句「台灣有事即係日本有事」，震驚中國上上下下嘅人，最近日本參議院通過設立國家情報局，又係明顯例子。日前喺新加坡舉行嘅香格里拉對話，日本防衛大臣小泉進次郎稱日本不應被標籤為新型軍國主義。其實，一個國家曾經侵略其他國家，對亞洲國家包括中國造成極大傷害，依家有一系列軍事、情報嘅舉動，好難令人唔諗起軍國主義！
公道起見，筆者先完全引述小泉進次郎與會嘅一番話，等讀者們睇清楚先，先引用、再客觀分析，等各位好好思考。
日本防衛大臣小泉進次郎：
「各位或有所耳聞，『新型軍國主義』一詞，但事實絕非如此，試想一下，有一個國家擁有龐大的核武庫及戰略轟炸機隊，日本沒有上述任何一種武器，但日本被標籤為『新型軍國主義』，不是很奇怪嗎？」
表面睇，小泉進次郎講嘅嘢「佢咁講又好似佢啱喎」，但讀者們諗真啲，中日兩國有咩分別。先講日本，發動戰爭，侵略別國，唔計成個亞洲有幾多人被日軍侵略時殺咗，單計中國，日本造成中國軍民傷亡超過3500萬人，包括慘絕人寰嘅南京大屠殺，侵華戰爭造成6000億美元嘅經濟損失，仲有慰安婦、人體實驗、文物破壞等暴行，當日本想將自己國家軍事「正常化」，畀日本侵略過嘅亞洲不同國家，根本好難唔會諗起新型軍國主義。
反觀中國，小泉進次郎講嘅核武、軍費等，首先中國擁核，係國際認可嘅擁核國，如果日本要批評人擁核，佢敢唔敢批評佢「老大哥」美國？至於軍費，其實相對於人口，中國嘅軍費唔算高，而且中國地大物博，同多個國家接壤，小泉進次郎對中國嘅抹黑，一係佢就「唔識嘢」，一係佢就「扮晒嘢」。
話分轉頭，喺小泉進次郎發言前一日，解放軍專家學者代表團團長、國防大學教授孟祥青就喺同一場合，指出今年係東國際軍事法庭開庭80周年，呢場「東京審判」將日本軍國主義罪行，永遠釘在歷史恥辱柱上，但如今有一啲勢力美化戰爭罪行，突破戰後和平體制約束，「一個沒有徹底清算軍國主義遺毒的國家，有沒有資格在國際場合大談防務合作？能不能贏得國際社會，尤其是曾經被它侵略過的亞洲國家的信任？我深表懷疑。」
之前，日本首相高市早苗去澳洲，然後「跪拜」人哋嘅陣亡士兵，日本想搞新型軍國主義，或者係極右勢力抬頭，其實仲有個底層問題，如果日本係愛和平、唔會挑起戰爭或衝突，點解多年以來，都唔為侵華戰爭、慰安婦以至人體實驗等，向返中國人民同南京死難者嚟個跪拜、道歉？當中原因，係因為日本唔覺得自己「有錯」，一個唔知錯嘅國家，然後有一系列軍事、情報機構嘅動作，其他國家唔話係新型軍國主義，會話係咩？日本如果本身「唔正常」，佢要求嘅軍事「正常化」，只怕會令到亞洲以至世界局勢再跌入「唔正常」。
（本文為作者觀點，不代表本媒體立場）
收藏
取消收藏
分享
