【點新聞報道】壽司店再現大嘥鬼！近日有網民在社交平台上載圖片，顯示有食客到連鎖壽司店用餐後遺下的大堆空碟，竟堆起如山般高的食剩飯糰，不禁問道「邊位師兄咁X癲」，帖文引發網友熱議，狂批點壽司「食魚唔食飯」行為「可恥」、「無衣食」。
樓主日前在社交平台threads以「邊位師兄咁Ｘ癲」為題，上載一張在壽司店拍下的照片，可見有食客點了至少20盤壽司，空碟垂直疊高擺放，大堆食剩醋飯則堆成「飯山」放到碟頂，粗略看約逾半呎高。樓主形容「啲人就係咁，唔食個飯都要叫壽司」、「佢唔似食唔晒，佢似係淨係食舊魚唔食飯」。
不少網民鬧爆浪費食物的行為，「唔係癲，係X街，嘥晒啲飯，食唔到就咪X叫啦！」、「折墮」、「CLS，好浪費」、「點解要玩食物」、「超嘔心」、「冇品」、「呢啲唔係叫癲，係叫無衣食，呢啲人因能住收尾果幾年」、「又嘥嘢... 唔食飯就直接叫刺身啦」。
有網民建議店方可讓食客在每款壽司都能選擇「少飯」或「走飯」，「要比人揀走飯或者淨刺身」、「應該在menu內俾多一個選擇，就係壽司走飯！」，又或職員可收懲罰式費用阻止明顯浪費的「大嘥鬼」行為。
（本文為作者觀點，不代表本媒體立場）
收藏
取消收藏
分享
