文/稀思路
稀思路素來鍾意上網睇下片、聽下唔同嘅KOL分析國際、金融同時事，最近上網睇到一條片，主持話依家英國青年，失業、失學同失去培訓機會嘅人數好高，仲話依家英國青年要搵工，可能仲難過入劍橋呢啲名牌大學。講到情況咁誇張，係真唔係真？筆者於是上網睇下新聞，結果係「珍珠都冇咁真」，喺英國未就業、未接受教育或培訓嘅「尼特族」（NEET）青年人數，首次突破100萬人，數字可能仲會繼續上升；一個曾經係世上最繁華嘅國家，做乜今日會搞到咁？
根據報道，有報告指出，今年第一季度，英國16歲至24歲嘅「尼特族」已經超過101萬人，佔同年齡段嘅13.5%人，比去年同期多咗近9萬人；喺呢101萬「尼特族」當中，有40萬人處於失業狀態，另外就有超過60萬人未接受教育或者未有接受培訓，媒體評論就認為，呢個係國家級危機。
如果讀者們唔能夠喺數字感覺到情況有幾恐怖，或者真實個案可以畀各位一啲啟示。一名24歲青年，2023年喺大學畢業，每星期寄超過50份求職申請，直言如果收到拒絕信就已經「好幸運」，指出僱主唔願意再培訓新人，想要加入學徒計劃？但做學徒要有3年工作經驗，即係想搵工搵唔到，想做學徒根本又冇本身最需要嘅工作經驗，認真吊詭。
另一位年紀相約嘅青年，受訪時表示自己申請唔同職位皆被拒絕，佢就冇每星期申請50份工咁多，但平均每星期就投出30份工作申請，然後先得到一次面試機會；最慘嘅係，佢家族同時有6名年輕人正在搵工，但大家搵到工嘅希望都好渺茫。英國職場有幾慘烈，從數字好，從個案好，都完全感受得到！
英國經濟唔係咁好，其實都唔係咩新鮮事，但係點解「新鮮人」（Fresh Graduate）咁難搵工呢？其實都要多得英國政府嘅政策，喺搵食艱難嘅情況下，「英明神武」嘅英國政府，增加咗僱主國民保險供款額，又推動年輕工人最低工資上調等政策，即係僱主如果請人包括請新人，其實成本係高咗，打擊到入門職位嘅招聘情況。加上人工智能、科技進步帶來嘅衝擊，僱主就更少誘因去請「只有學歷、沒有履歷」嘅青年。
不過，相關嘅報道，似乎冇提到一個事實或重要背景，就係英國幾年前脫歐，將英國發展局面扭轉，當年支持脫歐嘅人，唔少人係有一定年紀嘅英國人，作為既得利益者唔想歐洲其他人去英國「爭飯碗」，都可以理解。但其實脫歐後，英國出口、通關成本增加咗，來自歐洲投資又少咗，係會影響到英國經濟，依家雖然大部分英國人支持重新加入歐盟，但筆者估計短期內都見唔到機會。脫歐後英國經濟更差，青年更難找到出路，考慮埋英國政府看似保護、實質傷害到青年嘅就業政策，英國將會失落嘅，可能係「一代又一代」先真。
喺筆者小時候，雖然英國已經唔係世界最強國家，但當時經濟以至國際聲望，都仲係有返咁上下，時間一直推演，由脫歐、經濟冇轉型到今日過百萬「尼特族」，其實整個國家已經陷入危機。再結合最近嘅地方選舉，兩黨制變多黨制，只怕國內要達成政策共識更難。其實，如果英國執行一系列政策前，連民意、效果都掌握唔到，可能英國嘅上一代仲可以食住紅利，但往後世代，仲點發展落去呢？
（本文為作者觀點，不代表本媒體立場）
收藏
取消收藏
分享
