文/稀思路
記得小時候睇古裝劇，有句廣東歌歌詞係「政客總棉內有針」，意思大抵係表面溫文有禮嘅政客，實際可能係陰陰濕濕。日本首相高市早苗可能就係一個例子，每次佢行出嚟，總係笑容滿面，但實際做事起嚟，就完全係一個極右政客嘅表現，推動修憲、賣武器，一副要將日本推向衝突邊緣嘅咀臉。最近有新聞，就話高市早苗秘書疑似利用人工智能視頻抹黑總裁選舉對手，而且數量同密度都好高。如果高市早苗擊敗對手係靠抹黑，咁佢係咪需要問責下台呢？
事緣係咁嘅，有日本雜誌報道，高市早苗嘅秘書本下剛志，同木下合作、自稱係高市早苗支持者嘅企業家松井健，後者就被認為係呢啲抹黑影片嘅製作者。報道就披露，去年10月自民黨總裁選舉時，高市早苗陣營利用AI軟件，每日生成大約100至200段影片，其中大約七成係針對主要對手小泉進次郎，故意將對方攻擊成「無能傀儡」；而另外30%影片，部分用嚟「招呼」另一對手林芳正，部分就用嚟吹捧高市早苗自己。
該日本雜誌嘅報道，未必係空穴來風，因為報道公布咗木下剛志同松井健往來嘅郵件，包括二人謀劃製作抹黑影片，討論影片內容，仲提到今年2月眾議院選舉期間，松井健又再奉木下剛志之命，製作咗大量攻擊在野黨候選人嘅影片。雖然高市早苗全盤否認報道，認為自己下屬「冇做過」，不過涉事者松井健，就承認自己製作同傳播呢啲抹黑影片，話自己冇同木下剛志會面，但有喺網上聯絡同開會磋商。
事件一爆出嚟，一連串嘅報道就震驚日本社會，除咗各方要求高市早苗解釋事件，就算係自民黨內部，都出現唔少質疑聲音，有黨內資深人士更直言，如果高市早苗攞唔出證據證明自己清白，在野黨同公眾都唔會再信佢。有分析就指出，事件發酵落去，除咗高市早苗民望會下滑，嚴重情況可能會影響到佢首相職位。
呢件事嘅真假，讀者們可以透過報道資料去判斷，如果屬實，筆者想嚟一個「逆向思維」，「讚」下高市早苗真係識得利用科技。如果透過人手製作，高市陣營一日出幾條到十條影片「唱衰對手，捧高自己」都相當唔容易，喺AI嘅助攻下，一日出100至200條影片，對手想唔死都難。不過，選舉應該靠實力同正向宣傳，用海量影片抹黑對手，呢種手法除咗低劣之外，引伸出嚟嘅重要問題，就係高市早苗有冇勝之不武，道德操守水平係咪適合作為日本首相去代表日本。
任何經歷過嘅選舉嘅人，都知道攻擊、抹黑對手，多多少少都會有，但系統性利用科技去海量攻擊同為自民黨嘅對手，做法可能就比較難接受。公道起見，無論係製作影片嘅松井健，被指「下指令」嘅高市早苗秘書本下剛志，以至係高市早苗本人，都有責任披露更多事實，如果係清白嘅，外界唔好屈佢；如果真係有做，一個依靠抹黑上位嘅日本首相，仲適唔適合擔此大任？筆者估計，日本民眾再包容，應該都唔想自己首相係「抹黑的巨人」呀？
（本文為作者觀點，不代表本媒體立場）
收藏
取消收藏
分享
