【點新聞報道】英國出名重稅，喺英國嘅打工仔，通常出糧都已經自動扣稅。有移英港人網上發文大呻，一出糧就冇咗一大截，形容「個心沉一沉」，不滿反問「英國憑咩要收打工仔咁多稅？」。
一般嚟講，如果你係英國有工作，出糧會採用「Pay As You Earn」(PAYE)方式，即係一出糧，就會自動扣起要繳交英國政府嘅款項，例如 Income Tax（入息稅） 及 NI （國民保險費）等。有移英港人對此大感肉赤，在fb專頁「英國香港人工作支援群組」發文大呻「又到月尾，見到張payslip個心沉一沉。一大截人工拎咗去交稅」。
正所謂「無比較無傷害」，香港向來都是低稅天堂，不過英國稅制則完全不一樣，樓主怒指「我喺香港都從未交過稅，英國憑咩要收打工仔咁多稅？」
結果帖文惹來一眾網民群嘲「有幾大截？你未嚟嗰時都知㗎啦」、「喺香港打工都從未交過稅？究竟喺香港搵幾錢一個月？如果唔想交英國稅可以唔做嘢BNO Visa無要求一定要有嘢做」、「你在香港唔使交入息稅，入息都唔方高，低端人口去到哪都是低端」、「香港佢唔使交稅，咁佢叻極都有限！」。
不過，亦有網民認同樓主，「政府冇錢打仗，唯有割你韭菜」、「所以英國人好多情願唔做嘢，拎政府錢，住政府屋，得閒去超市偷下嘢，又唔會留案底，職員無權足你。真正有錢人都離開」。
收藏
取消收藏
分享
