文/稀思路
最近，有兩單有關連嘅科技新聞，一單係阿斯麥（ASML）講芯片限制，一單係講華為芯片突破，表面上兩單唔同時間發生嘅新聞，其實係指向同一件事，因為美國要喺科技、芯片上鎖喉，唔畀中國取得先進嘅芯片製造設備，但一直封殺，中國就一直自主自強，到近日華為就宣布預計到2031年，可以製造出等效於1.4納米製程芯片。難怪，連輝達創辦人黃仁勳，都話封鎖中國，反而會將中國市場讓畀華為。
喺20日，荷蘭光刻機巨頭阿斯麥（ASML）行政總裁富凱接受訪問時，就提到美國不斷升級對華芯片限制，話某程度上，反映咗當下西方半導體產業內部嘅複雜情緒，擔心美國進一步收緊限制措施，會擾亂市場同時，仲會倒逼中國加速自研替代設備。
其實近幾年，美國已經不斷推動盟友收緊對華半導體出口，而ASML就處於風暴中心，之前極紫外（EUV）光刻機被美國禁止對華銷售，依家即使係次一級嘅部分深紫外（DUV）光刻機，都可能面臨新嘅限制。最近，美國國會想進一步提出限制，而荷蘭政府已經正式向美國提出咗抗議。
先進嘅光刻機，係製造芯片不可或缺嘅設備，中國入口唔到極紫外（EUV）光刻機（可以製造7納米及以下嘅先進芯片），可能用緊次一級嘅深紫外（DUV）光刻機，喺芯片精密程度上，係輸蝕；但根據華為方面嘅最近公布，將會採用一個「韜定律」，基於該定律，高端晶片電晶體密度將達到1.4納米製程的同等水平。
依家市面製程最先進芯片，大約係用緊4納米以至3納米嘅製程（理論上數字越少越好），華為冇最先進嘅極紫外（EUV）光刻機，所以行另一路徑，利用器件、電路、晶片到系統層面的多層級優化，將會做出等效於1.4納米製程嘅水平，如果計劃成真，美國帶頭嘅封鎖戰，將會迫出中國喺芯片領域上嘅全新進程，就算稱唔上係「超英趕美」，但要供應人工智能、電腦芯片畀自己，應該完全唔成問題。
睇返過去多年，由核子、戰機、航母到航天科技等，每一個範疇，西方國家都玩科技封鎖，但一直封又一直封，換來中國科技一次又一次自主突破；有人話，芯片唔同其他領域，極其複雜又極難突破，如今睇嚟，中國又再一次抬起頭來，攻破極難攻堅嘅難關。
喺人工智能時代，要發展落去，必須有足夠算力，算力就靠芯片同電力，西方國家想喺芯片領域封死中國，其用心有幾毒，相信讀者都見到。如今中國芯片再有突破，我哋可以想像下，中國自己有更強嘅芯片，有充足而廉價嘅電力，而且有成本更低嘅大型語言模型等，將來人工智能嘅競爭，邊個國家會贏？依家嘅西方政客，又有冇覺得自己奸有奸輸？
（本文為作者觀點，不代表本媒體立場）
收藏
取消收藏
分享
