文/稀思路
呢排，筆者多咗喺「油管」（Youtube）睇唔同嘅影片同評論，包括部分港人會留意嘅日本內容，有一條長大約30分鐘嘅影片，大部分時間評論員都喺度講日本「如何迷失」，當有人以「平遊日本」嘅心態去日本購物時，其實當地人苦不堪言，收入低、稅率高，有啲日本人為咗節衣縮食，甚至要每日喺超市等搶平價食物。好明顯，曾經係世界第二大經濟體嘅日本，仲未「迷失完」，但諷刺嘅係，依家嘅日本首相高市早苗，似乎關注點就唔係點振興經濟，而係點樣令軍國主義復辟。難怪，高市早苗嘅民望，會慢慢地「高開低收」。
日前，日本《每日新聞》公布調查，高市早苗內閣支持率喺4月降至53%，半年之內，支持率已經跌咗12%，亦係連續兩個月下滑。有一組數字幾值得留意，就係對於日本政府應對物價上漲嘅政策措施，有一半受訪者認為「不充分」，即係做得唔夠好。
唔係筆者自己講，而係有日本網民評論，當前嘅日本政府，根本就係罔顧民生。面臨生活困難嘅家庭越來越多，物價問題冇得到緩解。令人氣憤嘅係，高市早苗喺選舉前，宣稱會推出嘅政策冇落實，但係就推動修憲、武器出口等法案，完全係照自己意圖行事，但就絲毫唔打算喺民生改善方面下工夫。
有關日本嘅問題，讀者們可能會諗，點解日本過去三十多年，經濟仲係一潭死水，撇除歷史或者外交因素，其實日本面臨生活成本高、經濟增長乏力、產業競爭力下降以至人口老化等問題，一個畸形現象，甚至係40至50歲嘅中年人，有部分係靠緊80歲嘅父母供養，可以話係「躺平始祖」。面對種種困境，明智嘅日本領導，應該着力去解決民生、通脹等問題，高市早苗反其道而行，已經注定條路好難走。
當然，高市早苗都係醒嘅，知道搞修憲、武器出口可以刺激到部分日本人嘅支持，但問題嚟喇，借復辟軍國主義，可能一時之間會有支持，但時間一拖長，更多日本人連溫飽都出現問題，高市早苗呢台「戲」，仲可以演幾耐？之前安倍晉三，喺經濟方面至少都有「三支箭」，但高市早苗連「箭」都見唔到，難道搞軍國主義會令經濟變好？冇可能！
喺日本政府政客包括高市早苗心目中，日本係「強國」，就算唔係世界級，都至少係亞洲頂尖。用「半杯水」嘅道理，我哋唔可以話高市早苗有錯，但係經過90年代經濟泡沫爆破，日本根本就冇再次站起來，過去引以為傲嘅汽車業、電子業等，其實已經走向衰敗。高市早苗可以繼續發佢嘅「極右」政客夢，甚至針對中國，但老實講，今日中國都唔係幾十年前嘅中國，日本妄想要對抗中國，甚至忘記二戰嘅侵略罪行，筆者只能夠講，冇喺侵略歷史得到反省嘅國家，根本就走唔遠。當中嘅底層邏輯，係日本唔願意承認過錯、責任，連自己過去都唔敢面對，又點會認真地思考未來？
（本文為作者觀點，不代表本媒體立場）
收藏
取消收藏
分享
