【點新聞報道】高齡商用車司機的駕駛安全備受社會關注，有網民分享與家人乘坐的士的驚嚇影片，可見一名年邁的士司機在駕駛期間疑似「恰眼瞓」，樓主直言「雖然年紀咁大都要養家好慘，但係我成家人條命喺佢手上，仲慘仲驚」。
該網民日前在社交平台threads上載一段影片，可見一名戴口罩的老翁駕駛的士期間疑似「恰眼瞓」，雙手雖緊貼軚盤，但雙眼疑似睜不開，頭部更不時向前晃動。樓主無奈地表示：「你哋估吓佢係瞓着咗，定係隻眼細？」，並坦言「雖然年紀咁大都要養家好慘，但係我成家人條命喺佢手上，仲慘仲驚」，希望政府能管制的士司機年齡。
影片曝光後，引起不少網民熱議，「直情係盲開，盲摸摸咁係度完美示範昏迷式駕駛」、「一來隻眼細，二來真係有啲舂舂吓」、「其實佢手上係揸住一個殺人武器，養家絕對唔係一個理由去將其他人的生命作為冒險！」有網民指樓主應即時叫醒司機，「你仲掛住影都犀利㗎啦，大大聲叫醒佢啦」。不過，其他網民反駁指，若行車途中突然大聲呼喝，可能會令司機受到驚嚇釀成交通意外，「大聲叫佢嚇親嗰一下抽腳可能架車就無啦」、「大大聲嚇親佢可能即撞」、「你一大聲分分鐘就炒車」、「嚇親佢一陣死得仲慘 」。
有網民分享恐怖經歷，「我之前試過仲恐怖，同老豆上咗架的士，由沙田去荃灣，開車唔夠1分鐘，見個老司機係咁（戚）又（檸）個頭，架車踏住兩條行車線。我喺倒後鏡望到佢，塊面係不受控咁抽搐眨眼。我捉實老豆隻手好驚，點知一出隧道，佢開始垂低頭瞇眼！我即刻大聲同老豆講今日天氣好好呀！司機即刻醒番抬高頭，我就係咁講嘢，直至落咗天橋過咗交通燈，即刻話要提早落車。我老豆驚到話，下次上的士前要望清楚個司機先，揀個似樣啲至上。」
有網民指有年長司機唔認錯，「早幾年我坐的士，個老人家司機係到『中下中下』咁釣魚，我驚到立即叫佢泊埋一邊停車，佢唔肯，仲大大聲答我：『我無訓覺！我有老花（眼鏡），望近野要低頭，所以先中下中下！』佢講完我仲驚，大佬我照俾錢，唔該你立刻停車！」
收藏
取消收藏
分享
