【點新聞報道】注意！市面出現疑似1蚊假硬幣。有女網民發文憶述，日前買餸收到兩個1蚊硬幣，事後細看始發現其中一個表面竟是「磨砂面」疑為假幣，大感震驚慨嘆「連1蚊都有假？」樓主翻查發現假1蚊新聞早於10年前已有報道，另往銀行查問亦獲職員回覆「覺得係假」，故籲大家多加留意。
樓主日前在社交平台threads發文寫道：「原來一蚊都可以係假」，並指「左邊嗰個係真，右邊嗰個好似磨砂面，啲細節唔清楚同埋側邊係光滑！」疑似假幣正面印上2017年份，但兩面中英文字及圖案皆模糊不清，側邊光滑沒坑紋。樓主其後將假幣拿去銀行，幾名職員初步看後也覺是假，允作進一步檢驗，「如果係真嘅話，畀返一蚊我，如果係假呢，就會收到信」。
樓主表示應該是買菜時找續得來，「平時真係冇留意！今日買油麥菜12蚊斤，諗住畀兩個一蚊嗰陣時先發覺有一個唔同！即刻留返」。樓主形容該假幣「有啲似冒險樂園嗰啲硬幣」，並笑言「冇諗過原來一蚊都可以係假」、「究竟要幾多個一蚊先可以賺大錢」。
帖文引起網民熱議，「1蚊都呃」、「練功券啲fd練功幣？」、「只是硬幣耗損，因為硬幣入過乾衣機之後所致」、「有可能只係有人貪玩磨」。也有不少網民對「1蚊造假」有所保留，「感覺做個假一蚊成本會高過一蚊喎」、「造假唔會造一個，一造就幾十萬個，先發現得一個半個，可信性唔高」。
有網民則提到「2017年時都收到過，原來依家仲存在市面上！」，更有網民上載疑似兩元假幣照，分享中伏經歷。而樓主也留言回應指，「新聞有話呢個係假㗎！！ 原來10年前已經有」，其後更附上新聞截圖，提醒大家日後找續時多加留意。
收藏
取消收藏
分享
