文/稀思路
日前，英國地方選舉結果出爐，意料之外又係情理之內嘅結果，就係執政工黨等大敗，改革黨冒起頭來，如果形勢持續，將來舉行嘅大選，可能唔係工黨亦唔係保守黨，而係由改革黨（可能另加其他黨）執政，英國政壇變天成為事實，其政治碎片化亦已經難以改變。喺呢場政治風暴當中，可能有人會唔察覺，部分用BNO移英嘅香港人，將來都可能被「祭旗」。
最近，筆者上網睇到篇文，大抵主旨為「英國大選變天，移英港人要倒霉了……」，內文非常值得深思。首先係英國改革黨上場，其實最大鑊嘅係港人BNO移民，點解？因為改革黨嘅核心綱領，就係「零移民、清移民，專門拿外來人口開刀」，特別嘅地方係，印度裔勢力大，佢哋唔敢鬱；非洲移民有法律保護，佢哋又唔掂得。思前想後，就係移英港人係最好開刀對象。
相關文章其實分析得幾有道理，幾年前，一邊高呼「自由民主」嘅香港人，賣曬家產、拋棄故土親人，投向英國懷抱。佢哋一方面抹黑祖國、割裂身份，想盡方法討好英國主子；但另一方面又融入唔到英國主流社會，喺洋人眼裏低人一等。具體例子有鄭文傑，被推出嚟參選輸咗，據悉之後佢受訪時只話自己係「東亞人」，卑微到骨子裏。
由於筆者唔肯定相關文章係咪基本立場真確，所以都上網睇下改革黨嘅舊聞，研究下佢哋嘅立場，睇2025年下旬嘅新聞，改革黨領袖已經公開過要大幅收緊移民同福利政策，可能受影響嘅包括用BNO移英嘅港人，講明以後如果由改革黨執政，會更改法律禁止非英國公民申領福利，並以五年期可續簽嘅簽證制度取而代之。
英國成個勢，就係反移民、反外來人，來自香港以至烏克蘭嘅，可能會成為當中嘅「弱勢社群」，筆者睇呢單嘢好簡單，英國政客就係「犧牲極少數，討好大多數」，改革黨如果要執政，一定要有吸引到支持者嘅綱領，英國主流都係傾向反移民，改革黨用激進而且將來易執行嘅政策，就算向部分移英港人「閂閘」，佢哋死係佢哋事，但改革黨就低成本地攞光環，犧牲香港移民嚟討好英國本地人，政治上合理，道唔道德係另一回事。
2019年後，有人認為英國政府有義氣所以吸納港人，筆者之前已經講過，咁係一種政治操作，英國政府抽完政治水，熱情就會退卻。如果讀者們唔信，睇下多年前香港回歸祖國前嘅歷史，其實當時都討論過香港市民可以移民英國；最後，英國梗係拍拍屁股就走人啦。過去幾百年，英國係靠海軍、耍政治起家，佢哋以前玩得叻，係因為總有人（例如部分香港人）會信佢哋，但英國政客其實只信利益，今日移英港人，某程度上已經冇價值。
收藏
取消收藏
分享
