【點新聞報道】正忙於籌備6月與譚輝智合作的紅館《雙聲演唱會》的羅啟豪（Ramon），近日在社交平台推出全新企劃「羅啟豪音樂小劇場之《歌單中的密碼》」，獲音樂串流平台邀請主持一小時音樂節目。
Ramon說：「一收到邀請就好開心，因為我有好多side track或者滄海遺珠想同大家分享。」Ramon靈機一觸，將14首歌串連成一個愛情故事「撞跌對方耳機」作開端。惟直播時因技術問題，部分獨白聽不清楚，他決定親自重新錄製並上載至社交平台。
Ramon直言完成後滿足感十足。今次他與團隊共同創作獨白，更借助 AI輔助。「自己中文真係唔叻，入行後要進步得快啲。AI幫我創作之餘，亦改善咗中文表達。」Ramon又透露心底渴望演戲，甚至想挑戰殺手、奸角等反差極大的角色。「正好借住呢個音樂小劇場過吓戲癮，希望不定時做落去，當成試鏡，等導演監製睇吓我有冇演戲潛質。」
今次選曲類型廣泛，最新一首是許志安剛推出的《信天翁》。他說：「一聽到《信天翁》就好鍾意，本來想網上翻唱，遇到呢個機緣就一定要揀呢首歌。」至於《雙聲演唱會》會否演繹《信天翁》及小劇場歌單？Ramon保持神秘：「Rundown暫時要保密，可以講嘅係除咗自己嘅歌，順應八、九十年代經典廣東歌熱潮。鍾意聽歌，尤其是side track，鍾意到一個病態嘅地步，決定不定期將喜愛歌曲製作成小劇場分享俾大家，希望更多滄海遺珠被聽見、被欣賞。」
（點新聞特約記者陳惠芳報道）
收藏
取消收藏
分享
