文/稀思路
喺英國以至美國，行咗兩黨政治好多年，喺美國係共和黨同民主黨「話事」，而英國過往則係工黨同保守黨嘅天下，但隨住英國地方選舉近日結束，本來嘅兩黨政治，基本上已經變為多黨政治。之前，保守黨執政乏力，於是工黨上台，點知工黨一樣唔掂，令改革黨喺今次英國地方選舉冒出頭來。從政黨數目去睇，外界可以用多黨政治、平衡嘅角度去睇，但現實啲講，多黨政治亦意味政治碎片化，冇一個或兩個政黨主導，可能將來英國嘅政局更亂，更難達到共識，曾經統治世界嘅帝國，好可能要喺下坡路繼續「走下去」。
關於英國地方選舉，有幾組數字值得參考，首先肯定係執政工黨大敗，喺英格蘭地區，工黨就損失咗接近1400個議席；而與此同時，改革黨就喺英格蘭由2席，大幅增加至贏得超過1440席，增加幅度係幾百倍。其次，就係從地方議會控制權嚟睇，工黨失去多個議會控制權，而另一大黨保守黨，亦喺多個票倉慘敗。本來兩黨政治嘅主角，變成由最少五個政黨分庭抗禮。
由工黨上場到依家，其實大約兩年時間，短短兩年之間，工黨、保守黨「再挫一城」，兩黨主導變多黨抗衡，外人睇落去似乎太快，事實係，因為英國選民覺得，兩大黨都係同樣信唔過。經歷過約翰遜同卓慧思搞亂英國後，就輪到工黨斯塔默上台，當時工黨仲曾經佔上國會較多數，不過，斯塔默最後仍然將一副好牌打爛。
喺選前，已經有英國媒體分析過選民會離棄工黨，最大原因就係經濟問題，基本上自從脫歐後，英國經濟就一直處於疲弱狀態，美伊戰爭爆發，更加係令英國經濟雪上加霜。對斯塔默最致命嘅攻擊，仲包括佢竟然委任同美國愛潑斯坦關係密切嘅文德森出任駐美大使，變相令斯塔默本人面臨嘅攻擊未能止血，為今次工黨大敗埋下伏筆。
仲有一點，就係工黨政府無力應對非法移民，以萬計嘅非法移民進入英國，但大部分又未被遣返，之前鬧出衝突，英國政府竟然安排難民入住酒店，一個年度就用咗超過200億港元。喺幾大致命傷下，工黨、保守黨都失去部分議席，而改革黨、綠黨等則冒起，形成英國政治新格局。
由兩黨變多黨政治，係好定唔好，好難一下子落定論，但有一樣嘢可以肯定嘅，就係假設英國地方選舉嘅結果或趨勢，延續到之後嘅大選，唔係兩大黨其中一黨話事，而係幾個黨都冇簡單大多數而可能要組成聯合政府等，會意味住英國要決定同執行政策時，更難取得共識，更難推行有爭議嘅政策；最終結果，可能係爭拗完一輪，都係得個嘈字，最後有損失嘅，就係喺英國生活嘅人。
以前睇啲政客辯論，有政客會話無論「西方民主」有幾唔好，至少選民有權用選票「換第二個」，但近年有個事實，就係英國執政權力更迭，不斷換，不斷試，結果係「沒有最衰，只有更衰」。表面睇，有人可能覺得係政黨、政客問題，但筆者想指出，英國嘅根本問題，係多年來經濟未有轉型、食老本同欠缺創新，邊個黨執政選民可以繼續換，但如果施政、經濟政策以至產業結構冇大改變，改革黨好，綠黨好，甚至自由民主黨執政都好，讀者信唔信，最後英國選民都係得一句感想，就係：「咪一樣（施政不濟）」。
收藏
取消收藏
分享
