文/稀思路
近日，稀思路喺網上睇咗一篇發人深省嘅文章，內容係關於高市早苗喺澳洲下跪獻花，微信公眾號「牛彈琴」質疑，「為什麼不能去南京雙膝落地？」話說，日本首相高市早苗「終於下跪」，不過唔係向被日本侵略過嘅亞洲國家下跪認錯，而係跑到老遠，去澳洲向無名戰士墓「下跪」獻花，相關文章引來極大迴響，問題係，受日本侵略而人命傷亡嚴重嘅亞洲國家，高市早苗視若無睹，而「唔太關事」嘅澳洲，高市早苗就「誠意十足」，除咗係雙重標準，當中又有咩含意呢？
根據「牛彈琴」嘅分析，高市早苗去澳洲「下跪」嘅場景，好特別，好突兀，但唔好以為佢係個人衝動，其實可能係佢嘅精心面具，因為澳洲背後嘅，係美國同英國等白人國家，高市早苗喺澳洲宣稱達成一系列協議，包括關鍵礦產、能源安全以及軍事合作，甚至聲稱要同澳洲等國家實現戰略、夥伴合作。
「牛彈琴」拆局，其實相當有道理，首先係日本領導人係可以下跪嘅，只係唔向亞洲而向西方國家「跪」；其次，就要日本需要補下歷史常識課，唔好忘記歷史，亦唔好選擇性記憶。作為二戰戰敗國，日本從來唔講「戰敗」，只講「終戰」，而且靖國神社仲供奉住眾多甲級戰犯嘅牌位，好明顯，日本軍國主義嘅幽靈從未散去。
筆者覺得「高市一跪」，有三個層面嘅意義或者值得反思嘅地方。第一，就係高市早苗崇洋媚外嘅心理，除咗喺澳洲一跪震驚亞洲各國，之前佢去見美國總統特朗普嘅畫面，嗰種「笑面迎人」嘅態度，真係令人有點嘔心。第二，就係要道歉、要跪，應該向二戰時受盡日本侵略之苦嘅亞洲國家跪，就好似「牛彈琴」咁講，相信總有一日，日本領導人會來到南京，喺三十萬死難者嘅靈前跪下——真誠地跪下。
至於第三，亦係亞洲國家近期關係緊張嘅原因，就係日本有軍國主義復辟嘅勢頭，無論係高市早苗上台後嘅不當言行、向供奉14名二戰甲級戰犯嘅靖國神社供奉「真榊」祭品、接二連三釋放強軍擴武信號、擬放寬武器出口限制等等，好明顯，高市早苗領導下嘅日本政府，都忘記咗日本二戰侵略其他國家嘅事，喺度推動「新型軍國主義」。如果亞洲各國冇行動、唔勸止高市早苗，肯定佢會越玩越過份。
早前，有幾萬名日本民眾集會，反對高市早苗政府推動解禁武器出口、修改「和平憲法」等擴軍危險動向。除咗喺東京，日本多個地方都陸續有類似集會，甚至有傳媒指「高市作為首相的存在本身，才是日本的存亡危機。」高市早苗嘅言行，將日本以至亞洲國家，都推向一個更為危險嘅境地，但筆者要強調，相距二戰結束已經有80年，今日嘅日本唔係當年，如果仲想擴軍、修憲然後做「亞洲最強國」，筆者想同高市早苗講句，踏實啲、和平啲，唔好危及亞洲嘅安全同穩定！
收藏
取消收藏
分享
