【點新聞報道】移民搵工絕對係一大難事，有移英港人發文自問英文能力好，但都好擔心搵唔到工，唔夠錢養家咁話喎。有網民直指，「如果要搵$（錢），香港易好多，香港靠學歷靠經驗。呢度靠英文好，甚至之前在英國讀完大學，都難搵工。」
有移英港人在fb專「英國香港人工作支援群」發文求教網民，「如果英文溝通能力好係(喺)英國難搵工嗎？不限工種。搵埋夠唔夠日常家庭生活開支？」不少網民留言直指英文好唔好同搵唔搵到工，基本上關係不大，「英國注重經驗同推薦多過英文水平同學歷。唔信嘅話，你可以望下今年16%嘅英國大學生失業率去安慰自己。」
有網民指英國人工低，不足支付生活開支，「搵local 工唔難，但一份人工唔夠一個月開支」、「英國人工低係日常，唔關英文level 事。本地人都一份長工+幾份part-time，夠唔夠支持日常開支就唔知道啦，因人而異」。有網民更將香港和英國兩者比較，「如果要搵$（錢），香港易好多，香港靠學歷靠經驗。呢度靠英文好，甚至之前在英國讀完大學，都難搵工。呢度靠local referral多D。利申，我就是未搵到工。」
不少網民認為有樓有積蓄，先有資格打風流工，「其實而家呢刻，英文好唔好都唔係容易搵工，你咁樣問好難答，拎住幾廿萬同拎住幾千萬已好大分別」、「如果你要租樓，做份最低工資，根本上council tax，屋租，水電煤，已經用哂你份人工，係未計食，如果你已買樓已經full pay咁又另計」、「做緊文職稅後得1700鎊，好多同事都係搵咁多咋，年紀都唔細，我都唔明d local點為生。香港人如果有樓有存款都勉強夠嘅。」
有網民認為最緊要捱得，「如果要易搵工。夠大力大隻重要過比英文好」、「英文好到本地人咁，咩工作都肯做，根本一定有工作做，問題係例如，清潔工人咁辛苦工作你手腳快唔快?頂唔頂到?生活就一個人生活先夠，重要租住平房先掂。」
收藏
取消收藏
分享
