【點新聞報道】「THREE IN LOVE 草蜢演唱會2026」昨晚（5月2日）於紅磡香港體育館舉行第六場演出，全場爆滿。是晚最令樂迷驚喜的，是重量級表演嘉賓「歌神」張學友驚喜現身。
張學友出場與草蜢合唱經典金曲《暫停，開始過》，全場觀眾揮動應援燈齊聲大合唱，氣氛高漲。蔡一智（阿智）表示，學友曾擔任草蜢25周年演唱會嘉賓，如今40周年再次同台，意義非凡。「自從我哋師傅（梅艷芳）走咗，我哋視學友為長輩，有咩都會去問佢。」學友則幽默回應：「我本來唔戴眼鏡上台嘅，草蜢好似食咗防腐劑，出場前台下啲人叫我最好戴返副眼鏡，遮嚇啲皺紋、眼袋，睇起上嚟夾啲！」引來全場笑聲。
阿智指學友一直有一個「迷思」，到底與草蜢誰是前輩？阿智說：「學友成日話我哋出道先，我反對，因為我哋參加完新秀之後，我參加19區歌唱比賽唱學友嘅《造夢者》。」兩人即興合唱數句。蘇志威補充，草蜢參加1985年新秀，同年與梅艷芳踏上紅館；學友自爆1983年參加新秀但未入圍，翌年參加歌唱比賽並於1985年出唱片。四捨五入下，學友終被「認證」為草蜢的前輩。
談及前輩，學友主動提起草蜢經理人林珊珊：「講起林珊珊，佢真係好勁！我上網睇到佢唱《再見Puppy Love》，我突然變得後生咗，好耐冇試過回春嘅感覺，佢係我覺得最正嘅嘉賓。」蔡一傑（傑仔）即回應：「你都好正，每次見到你都好似見到家人！」學友認真大讚傑仔：「你好勁！」全場掌聲雷動。
學友有感而發：「草蜢無論大騷細騷、有騷冇騷，都一齊40年！我自己一個人唱40年唔使理人，好易，但你哋三個一齊40年真係好難，唔係講笑，衷心佩服！」
隨後，阿智表示有禮物送給學友，學友笑說：「我等咗好耐，上網睇到嘉賓有禮物！」阿智送上一面錦旗，上面寫着「學友兄，你是我們唯一傳奇。智、威、傑上」。學友笑言不可掛在睡房，阿智即說：「你掛住一個人就得啦！」學友妙答：「要入紙申請㗎！」全場爆笑。傑仔特別點唱學友的《你是我今生唯一傳奇》合唱，阿智更向觀眾得戚說：「你哋買飛睇學友要第一行，我哋可以咁貼，係咪好妒忌呢？」
演唱會完騷後，阿智、傑仔、經理人林珊珊及演唱會監製家萍等團隊，留在紅館後台，為5月3日生日、正式「登六」的蘇志威舉行倒數慶生派對。踏入零時零分，眾人齊唱生日歌，場面溫馨熱鬧。蘇志威的太太劉小慧與兩名女兒Yumi、Ina上前擁抱。蘇志威興奮揚言：「聽日尾場，我會落足200%力表演，慶祝我60大壽！」
（點新聞特約記者陳惠芳報道）
收藏
取消收藏
分享
