文/稀思路
美國同伊朗雖然在停戰當中，但會否再打、幾時再打，仍然都係未知之數，最新消息，就係有美媒引述美國官員稱，總統特朗普已經指示幕僚，準備要對伊朗實施長期封鎖，即係繼續玩極限施壓，如果伊朗唔喺核問題讓步，就可能會「鎖死」伊朗。表面上，美國係威係勢，但稀思路想講，其實美國依家可能已經「三不得」，包括打不得、退不得以及談不得。
點解話美國打不得，美國明明係全球軍力極強嘅國家？美國要繼續打伊朗，當然得，但過去幾日已經有媒體報道過，因為戰爭消耗極大，美國嘅關鍵彈藥庫存正快速下降，美國國防部與戰略與國際問題研究中心 (CSIS) 評估指出，多項核心武器庫存已消耗約一半，而且補充速度有限，恐怕要幾年時間先可以填補缺口，對美軍戰備構成好大壓力。
相關報道就算唔係100%真確，相信都反映一定事實，因為美國不斷用貴嘅飛彈去攔截伊朗嘅平價武器，人哋出「豉油」，佢就下下出碟「雞」，就算空軍碾壓伊朗，但彈藥虛耗一定好大。仲有，如果美國再開戰，被極限打擊嘅伊朗，下一步會點反擊都好難講，美國付不起代價，美國盟友更加係「怕怕了」。
至於退不得，其實美國都唔係退不得，而係一退一縮，即刻又畀全世界恥笑特朗普又Taco（特朗普總是退縮），特朗普視尊嚴如命，要佢認軍事行動失敗，近乎係冇可能。讀者們可以睇下特朗普過去兩個月講嘅嘢，無論美國戰況如何，佢都係對外聲稱「贏、贏、贏」，如果未同伊朗談判好就退，咁特朗普呢位老人家嘅面子又擺去邊呢？
而講到談不得，道理都係非常簡單，美國無論點迫伊朗，伊朗都係大約維持兩個原則，第一係擁核，第二要喺一定程度上控制霍爾木茲海峽，如果美國想傾，要喺一定程度上向伊朗讓步；但只要一讓步，全世界就會覺得係美國打輸仗，然後又回到特朗普掉失面子嘅「重要問題」。美國想傾，又唔可以滿足伊朗嘅核心要求，所以就變成談不得。
打不得，退不得，依家個勢似係談也不得，筆者覺得，伊朗其實將整個局勢睇得好清晰，如果向美國讓步，等同斷送成個國家畀美國；既然係咁，點解唔去盡佢，同美國賭一鋪？軍力不如美國，空軍被碾壓，但係美國同佢盟友都有軟肋，就係油價同經濟，而特朗普本身仲有中期選舉嘅壓力。睇返兩個多月前，特朗普做「傻瓜」聽以色列講去襲擊伊朗，呢個致命錯誤，有可能會斷送埋自己嘅政治生命，呢個世界，善惡到頭終有報。
收藏
取消收藏
分享
