文/稀思路
喺若干年前，內地有套大型紀錄片叫《大國崛起》，按時序有系統地介紹咗唔同大國崛起嘅過程，頭幾個喺世界崛起嘅大國，基本上都係歐洲國家，有葡萄牙、西班牙、荷蘭、英國同法國，佢哋加埋至少主宰住地球命運幾百年，之後隨美國崛起，歐洲嘅影響力亦慢慢減低。邊個會諗到，影響力少咗係事實，但發展到今日，歐洲國家（主要指歐盟）會對世界事務近乎「零話語權」，從中東衝突到能源危機，歐盟都有坐以待斃嘅感覺，最近佢哋搞咗場歐盟領導人非正式會議，得出嘅最大結果，就係「冇結果」。
話說，歐盟領導人非正式會議喺23日至24日舉行，會議聚焦伊朗戰事以及其引發嘅能源危機，同時亦會討論共同防禦、財政框架等議題。一班歐洲領導人煞有介事地開會，因為喺中東嘅戰事，引發出一波能源危機，歐洲各國嘅能源、生活成本上升，再拖落去，又會嚴重影響經濟同民生發展。
一班有頭有面有勢力嘅人坐埋一齊，理應會得出解決方案或者至少有個方向，但係，呢個歐盟領導人非正式會議似乎都係冇咩結果，有傳媒就進行分析報道，經過兩日會議，記者得到嘅答案就係「各種呼籲、倡議、計劃，以及繼續討論」。喺最為關注嘅能源、燃料問題，歐洲領導人無能力攞出方案，只係強調要外交解決，維護霍爾木茲海峽航行自由。咁美國要求歐洲一齊護航霍爾木茲海峽又點？歐盟都係冇明確表態。
睇返相關新聞，喺其他重要問題，例如關於歐盟嘅長期預算、防務開支等問題，基本上都討論唔出實質嘅成果，媒體總結呢個會議，就係「中東問題，繼續呼籲；能源問題，交給未來；共同防務，繼續研究；長期預算，繼續爭吵……各方都承認必須行動，但在真正行動之前，還要再開幾輪會。」
對於歐洲面對嘅問題，筆者認為可以分為兩個層面，第一個層面係，隨住中國、印度等崛起，世界嘅南方國家人口、經濟實力都喺度增長，「原地踏步」嘅歐洲，喺全球影響力下降係不爭嘅事實，縱使佢哋嘅文化源遠流長，但從人口、經濟結構等方面睇，被超越係正常嘅事，筆者估計，呢個此消彼長嘅情況，仲會繼續加劇。
另一層面，就係歐洲本來同美國唇齒相依，一直都係「拍住上」，但係自美國總統特朗普再上台後，現屆美國政府嘅立場，就係唔想再畀歐洲「搭便車」，咁就大件事喇，歐洲嘅經濟同國防，一直都高度依賴美國，依家要自己嚟，都未嚟得切建立一套屬於歐盟、有效嘅防禦系統，可能就「被脫鈎」，準備不足嘅歐洲，只能夠眼白白睇住中東問題惡化，而自己嘅能源價格就一直上升。
任何事情都係有因有果，今日歐洲嘅困局，可以話歐盟未夠自強不息，亦可以話佢哋無對今日嘅局面，一早做好相應嘅準備。妄想美國永遠都會「罩住自己」，但美國都係一個利益先於道義嘅國家；嚴重依賴外來能源，但又冇建立一套屬於自己嘅安全以至可再生能源體系。
當今日歐盟對世界事務變得束手無策，筆者覺得佢哋係時候摒棄過往同美國「深度合作」嘅模式，應該擁抱世界其他國家，建立出唔會依賴美國嘅安全體系。仲有一點，其實歐盟喺伊朗戰爭一事，可能已經得罪咗特朗普，之後特朗普會唔會將目光再次放喺格陵蘭，都係未知之數。百年合作，換來歐洲近百年和平，但原來曾經稱霸世界嘅歐洲，今日已經變得如此脆弱。
收藏
取消收藏
分享
