【點新聞報道】《撞到正》（1980）4K數碼修復版昨晚（25日）於香港文化中心大劇院舉行全球首映揭開序幕，該片監製兼演員蕭芳芳驚喜現身，導演許鞍華、副導演關錦鵬、演員劉天蘭、藝術指導李樂詩等亦有出席。
蕭芳芳一出場先向現場觀眾送上飛吻，「多謝你們鼓掌，今日我覺得好幸福，46年前我哋拍嘅呢部戲，今日有機會喺呢度做首映禮，因為楊凡導演先至有呢個機會，亦都要多謝電影資料館，我好感激佢哋修復咗呢部戲，我諗呢部戲修復咗之後會好好睇。要多謝導演阿Ann，多謝Tina，多謝李樂詩，多謝阿關，多謝蓮姐幫我哋化妝，係度套戲好似得咗獎咁，最後一句，我祝大家身體健康，日日都快樂，唔阻大家睇戲。」
許鞍華憶述說：「今時今日再睇呢部戲都唔會覺得悶，呢套戲嘅構思係當時係相當前衛，而且係芳芳諗出嚟，我以為要拍好驚嘅內容，但芳芳話唔好拍到咁驚，如果唔係家庭觀眾就唔啱睇。」
關錦鵬說：「我好開心可以跟許鞍華導演做佢嘅副導演，因為喺佢身上我學到太多嘢，果陣時芳芳姐同B哥哥已經係非常紅嘅演員，我細個住嘅地方隔離就係戲院，我好鍾意睇陳寶珠同蕭芳芳嘅《彩色青春》同《紫色風雨夜》。」
導演楊凡以特別嘉賓出場給芳芳姐獻花，「頭先我喺入面聽到芳芳多謝呢個，多謝果個，其實我哋大家要多謝芳芳，因為佢又主演又投資，做出一套咁好嘅電影，呢套戲1980年上畫果陣我唔係香港，後來我睇返真係覺得好特別，我覺得有8個字可以去形容芳芳，就係無可取代，影壇宗師。」
（點新聞特約記者陳惠芳報道）
收藏
取消收藏
分享
