文/稀思路
今次美國同以色列襲擊伊朗，引發已經持續差唔多兩個月嘅戰爭，讀者們都可能留意到，美國總統特朗普「彈出彈入」嘅工夫十分了得，一時就聲稱美國已經全面取得勝利，一時就話等待伊朗同美國談判。如果美國已經大勝伊朗，點解要等伊朗肯同美國傾呢？又或者，如果伊朗好似委內瑞拉咁，其實美國係咪可以直接接管伊朗？喺最近兩國停火期間，筆者講得白啲，就係特朗普迫降伊朗失敗，依家傾唔傾、幾時傾，似乎主導權已經喺伊朗手上。
本來，美國同伊朗嘅停火期限差唔多屆滿，正當外界以為美國會開始恢復轟炸伊朗時，特朗普又再Taco（退縮），突然宣布延長停火期限，直到伊朗提交方案同完成磋商，期間，美軍會繼續對伊朗實施海上封鎖。不過，伊朗方面就質疑，美國做法可能只係緩兵之計，美方會喺呢段時間做好準備，之後再對伊朗進行突襲。
睇返整場衝突嘅時間軸，其實伊朗咁諗又非常合理，喺美國同以色列向伊朗發動戰爭前，美國就同伊朗就核問題等談判緊，本來傾得好地地，仲傳出雙方已經取得一定成果；殊不知，兩國一邊傾，美國、以色列就喺另一邊廂炸死伊朗領袖，跟住瘋狂轟炸伊朗，依家美國話要等待，要同伊朗再傾，將心比己，伊朗錯信過美國一次，都唔係依家美國話傾就傾嘅。
特朗普選擇公開表示延長停火期，如果係出於戰略，咁明顯又係玩緊「伺機偷襲」嘅陰招；如果係被迫表示延長停火，咁可能代表美國對住伊朗，可以用嘅板斧已經唔多。可能讀者會好奇，點解伊朗被瘋狂轟炸，仲可以咁有底氣，筆者呢兩日睇過分析，指出伊朗目前仍然保留咗唔少武器、導彈以及發射車等，唔怕美國、以色列「來」，因為伊朗為咗對抗美國侵略，已經做咗好多年準備。另一方面，相比起之前嘅戰爭，美國今次發起嘅不義之戰，近乎係冇盟友幫手。
如果從根本去講，特朗普喺開戰以來，一直係玩緊極限施壓，到停火期間，就係喺度脅迫伊朗，公道啲講，如果美國係有心傾，點解要對伊朗實施海上封鎖？如果想和平，又點會將航空母艦再調到附近海域，擺出一副「隨時再打你」嘅姿態？特朗普玩脅迫唔係第一次，但可以用喺其他國家身上嘅套路，今次似乎就不適用於伊朗，筆者覺得除咗因為血海深仇，都係因為伊朗明白，如果向美國妥協，等同將成個國家嘅命運「送畀美國」，所以寧願血流，絕不投降。
當中東局勢膠着之時，美國國內嘅輿論變化，筆者認為都值得讀者們留意下，根據路透社民調，特朗普依家喺國內嘅支持率，已經跌到得返大約36%，比佢再次上任美國總統時，跌咗一大截；睇美國國內新聞，油價、生活成本上升，已經一步步喺度蠶食緊特朗普嘅支持度。讀者有冇諗過，伊朗封鎖霍爾木茲海峽、攻擊美國嘅中東盟友，軍事上不能戰勝美國，但可以從美國盟友、美國國內輿論兩方面「側擊」美國？特朗普公開表示延長停火，可能都係迫於無奈，一個自大嘅美國領袖，突然變成「無言的Trump Trump Trump」，再演變落法，只怕美國陷入泥沼越深，而美國嘅盟友、特朗普國內嘅支持者，都會慢慢離開特朗普，之後嘅中期選舉，可能變成特朗普嘅「終局」。
收藏
取消收藏
分享
