文/稀思路
過去十幾年，香港嘅政治生態風雲色變，表面睇係一班反對派、攬炒派喺度搞事，但如果我哋睇真啲又睇深啲，其實一切禍根，係緣於香港嘅反對派有美西方惡勢力撐腰，外國勢力仲係喺關鍵時刻，想盡辦法令香港更亂，如果冇中央制定香港國安法，2020年嘅香港肯定更為危險。最近，美國發表所謂《香港政策法》報告，評論香港嘅人權、自由等狀況，但綜合其內容，其實係「砌」香港生豬肉，講人權好，自由狀況都好，香港比美國好得多！
基本上，從香港國安法制定以及生效以來，國安法就成為咗美西方重點抹黑嘅對象，無論香港通緝潛逃海外嘅國安法疑犯，以至係拘捕同通緝犯有金錢交往嘅疑犯，喺美國眼中，呢啲全部都係「有問題」。但講到維護國家安全法律，香港係有，但美國都有，而且條文更多，刑罰更辣，喺美國嚴格執行國安法律嘅情況，其實到底美國抹黑香港啲咩呢？美國需要維護國家安全，香港特區一樣都要。
睇相關報道，美國似乎仲有針對香港新聞自由嘅情況，而美國報告所引用嘅，仲係香港記者協會（記協）嘅調查。問題就嚟喇，記協係傾向反政府嘅組織，美國選擇引用記協嘅內容，咁好自然就會得出不利於香港特區政府嘅結果；一個明顯以偏概全嘅報告，係咪可信呢？如果我哋睇返美國數據，單單係2025年，美國執法當局就拘捕超過30名記者，而且對記者施加暴力嘅個案，更加係超過170宗，當中九成涉及美國嘅執法人員。由此可見，如果要「關心」傳媒，應該關心下美國嘅新聞自由狀況先真。
若然讀者們有留意下美國新聞，仲有一個有趣嘅情況，就係上至美國總統特朗普，下至美國白宮發言人，都係相當唔尊重記者，如果記者問嘅問題係美國官員想要嘅，十分客氣；相反，如果問着尖銳嘅問題，美國官員係會當眾侮辱記者，仲試過威脅要以叛國罪名起訴傳媒。至於特朗普本人，亦會針對傳媒報道要提告傳媒，講新聞自由，美國嘅新聞自由問題似乎就嚴峻得多。
要衡量一個地方好與唔好，除咗執法、新聞自由同人權狀況等，其實經濟數據都能反映情況，無可爭辯嘅事實，就係香港國安法實施以來，香港各方面都向好，再成為全球最自由經濟體，國際金融中心、全球競爭力等排名，都係處於世界頂尖；疫情後經濟維持正增長，其他嘅無論係IPO、股市交投、資金流入等，數據都係向好發展。點解會咁？因為市場需要確定性、穩定性，而香港喺國家支持下，就能向全世界提供穩定嘅投資環境。
相比之下，美國國內情況相當混亂，之前筆者都寫過，美國嘅「不要國王」（No Kings）行動已經發起咗幾輪，特朗普外交、內政政策，都被批評得體無完膚；雖然美國國內都有石油或天然氣等資源，但係美國襲擊伊朗同時，國內油價都喺度升緊，民不聊生。一個發達國家，越搞越衰，反對者、記者統統受到針對，乜美國仲好意思，去評論香港嘅狀況？就好似筆者喺上一段所講，香港各項指標持續向好，而且係得益於香港國安法嘅制定，當西方國家自己都有維護國家安全嘅法律，而又要抹黑香港時，其實外部勢力最想嘅，就係香港「不設防」，等佢哋可以挑起事端，所以所謂《香港政策法》報告，算吧啦！
收藏
取消收藏
分享
