文/稀思路
無論從新聞、歷史以至電影，稀思路相信唔少讀者多多少少都睇過中國有好多文物被盜、被搶而流失嘅故事，事件既反映百年前嘅國家屈辱史，亦反映當年列強對中國巧取豪奪，搶去唔少國家級文物，過去嘅不公義仍然有待糾正。最近，法國國民議會就以170票贊成、0票反對下通過咗新嘅文物歸還法案，法案旨在簡化殖民時期掠奪文物嘅歸還流程，預計會由總統馬克龍簽署並頒布。筆者喺度諗，如今歐洲有法國帶頭，推動、簡化文物歸還程序，搶咗好多中國文物嘅英國，係咪都應該做返啲嘢，歸還文物畀中國呢？
根據現行嘅法國法律，納入國家收藏嘅文物，原則上係「不可轉讓」，歸還相關文物需逐案立法處理，程序較為複雜，喺新通過嘅法案，容許法國政府通過行政命令嘅形式，授權歸還文物，而無須每次都經過議會審批；新法案適用於1815年6月至1972年4月期間法國掠奪嘅藝術品同文物，如果係1972年之後發生嘅，就只能以民事方式解決。
雖然按照新規，歸還掠奪文物仲要經過兩個委員會審查，但係法國議會嘅新法案，明顯已經係相當進步。有分析就指，法國議會能夠全票通過法律，無疑為國際社會開咗好頭，唔止有助於法國喺全球範圍內樹立良好嘅國家形象，也反映出西方大部分國家對於歷史上此類文物返還問題，正逐漸形成更多共識，預計歐洲其他國家如德國、荷蘭、比利時等，將會受到正向激勵，同時會感受到一定壓力。
對於法國嘅新法案，筆者除咗支持，立即諗到嘅問題，就係搶掠咗好多中國寶貴文物嘅英國，係咪都要做返啲嘢，將應該歸還嘅中國文物，畀返我哋國家呢？睇相關資料，大英博物館擁有西方最大嘅中國文物「收藏」，館藏嘅中國文物可能大約有23000件，時代更係涵蓋新石器時代至今；種類方面，十分繁多，有繪畫、版畫、玉器、青銅器同陶瓷器等，之前就有中國網民呼籲，大英博物館應該歸還文物！
如果讀者有了解過國家歷史，從第一次鴉片戰爭開始，我哋國家就有過百年屈辱嘅歷史，之後無論係八國聯軍入侵以至二戰被日本侵略，都充滿住中國嘅血同淚，今日流失於海外尤其係大英博物館等中國文物，一件又一件，係一個又一個國家文物被搶掠嘅故事。內地有同胞要求歸還文物，既出於不可爭辯嘅歷史事實，亦係出於一顆愛國心，當年搶中國嘅，都應該歸還中國。
筆者就認為，要求外國歸還文物，背後仲有兩層意義，第一係今日中國已經強大起來，唔會再被當年嘅「列強」欺負，出於糾正嘅正義，法國立法簡化歸還文物流程，係應有之舉，其他國家應該跟隨。第二就係，如果國家唔安全，被侵略、被強搶係必然結果，有國家安全，先至有發展、有民生，今日伊朗被侵略就係一個好例子。日前（15日）係第11個全民國家安全教育日，其實外國「收藏」嘅中國文物，印證住中國曾經淪為半殖民地、國家安全不足嘅歷史，睇到中國文物，反思國家安全，都係一次生動嘅國安教育課堂。
收藏
取消收藏
分享
