【點新聞報道】不少移民英國的港人，個個都幻想能夠脫離香港的「社畜」生活，現實卻換來狂開OT、被篤背脊，仲要被人事部批鬥㖭。有移英港女發文中呻英國工作的辛酸經歷，直言感覺非常累人，亦已作好最壞打算。
該名移英港女在社交平台threads發文表示，雖然可以做回老本行，但自覺能力不足應付，「移英做左本行兩年，始終未能完全應付到工作要求，英文會話已經比剛來好左好多，但係本身行業要求極高應用。」
她大呻工作負荷重，少少錯漏都遭到經理針對，不斷質疑其工作表現，「由上年第三季開始work load不停加大，已經要ot先趕到deadline，但係比manger 話我有careless misstakes，斷而針對我work quality。其實我大約係做好多樣野先出幾個misstakes，唔知幾時開始比人捉得幾緊，跟手比人跟進咗幾次performance問題」。
樓主其後發現公司的同事表面上親切友善，實則笑裏藏刀，經常向經理篤背脊，「原來呢度同事間督背脊都幾多下，係咁同我manager report 我有咩mistakes，開始發現呢邊d人表面nice，但係後面會照樣講你不事。」
樓主認為忙中有錯，情有可原，但經理不斷挑剔，「Ot ga情況開始增多，試過一個月趕3個deadline。當中間歇性出現check漏野，但呢d變作比個manger捉住來講我，仲連埋我溝通問題來講。」
樓主懷疑為炒人鋪路，「原來UK做多過一段時間會有一個capabilities review policy，感覺上好似搜集緊證據去為炒作準備，來星期二又要見埋HR開多次類似聽証會咁ga野，感覺非常累人，睇來我要作好最壞打算。」
不過，帖文並未獲得網民同情，皆因短短一篇帖文已錯漏百出，難怪經理要出手，「你個misstakes，有mistake 」、「仲有佢個manger同manager唔知係咪兩個人，樓主的問題似乎唔係咁簡單」、「淨係睇到你呢個post啲錯字都有啲躁 俾我係你manager都會同你嚴肅溝通下」、「咁站喺公司立場 一個已經做咗兩年，都仲應付唔到工作要求+做野成日要人執手尾既員工 又真係要review下留唔留喎」。
另有網民贊同樓主睇法，「我喺英國30年，話俾香港人知英國人都可以好賤格好衰，但移民潮之前冇人信，而家你哋感受到啦、明啦 」、「全間公司都係敵人，英國同事間係無朋友的。佢地睇人恰，只要第一日有位入，佢地就會好自信咁食硬你，尤其睇落好弱好無料成日同你講嘢嗰d 」、「英國職場係咁，表面好nice但背住你就...我覺得可以用等炒心態，咁你會開心啲。返咗兩個幾月工，覺得呢份工個上司太Pk，續約又係跟佢，而家唔會搏表現轉perm.」。
收藏
取消收藏
分享
