【點新聞報道】正所謂「有人辭官歸故里，有人漏夜趕科場」，有一名移民英國的港男近日放假回港，專程去茶餐廳嘆早餐時，聽到隔離枱傾計，其中一人是從英國回流的大叔，對方坦言當初是為家人而移民，「試咗幾年，唔鍾意就係唔鍾意，返嚟咪返嚟囉。」樓主頓時有感而發，「可能過多幾年，我都係會好似位阿叔咁」返香港重啟人生。
一名移英港男近日放假回港，並在社交平台theads發文，分享在茶餐廳聽到一段發人深省的對話，「喺香港放假最後一個朝早，去咗茶餐廳食早餐。香港地啲位係咁近，你唔想八卦，但隔離枱啲對話都會自動入耳。」
原來隔離枱其中一名食客是從英國回流的大叔，「隔離坐住兩位五十幾歲嘅阿叔，一個係啱啱從英國回流返嚟，另一個就係佢嘅香港老友。」席間，友人問大叔回流的原因，「當初你大陣仗到連家當都搬晒去英國，而家又搬晒返嚟，兜咗成個大圈，唔辛苦咩？」
回流阿叔好淡定咁啜咗啖奶茶，剖析自己去留的原因，「其實我由頭到尾都唔鍾意英國，嗰陣去都係為咗其他人。試咗幾年，唔鍾意就係唔鍾意，返嚟咪返嚟囉。」對話間，大叔透露，回流之後生活好似更精彩，兼且有了新歡。
樓主聽罷頓時感觸良多，「我望住自己碗麵，心入面有種講唔出嘅感觸。對佢嚟講，幾年前運去英國嘅貨櫃，好似只係買咗張貴少少嘅人生體驗券。」樓主慨嘆「呢張茶記枱就好似一個平行時空。阿叔行完咗個大圈，終於返到呢個熟悉嘅環境重啟人生；而我食埋呢餐，過多幾個鐘就要飛返去嗰個阿叔『唔鍾意』嘅地方，繼續返工、送細路讀書。」
樓主認為去定留沒有絕對的對錯，「其實冇話邊個贏邊個輸，純粹係一種圍城效應：出面嘅人想衝返入嚟，入面嘅人又要乖乖地衝返出去。」
樓主眼見大叔已經「降落」返香港，而自己又要飛返英國，不禁有感而發地表示，「可能過多幾年，我都係會好似位阿叔咁，喺香港某一間茶記同人講返同一句說話。」
收藏
取消收藏
分享
