文/稀思路
到底一個人要幾自大，先至會當自己係神或者耶穌呢？如果係一般人自大，我哋或者可以當係「一樣米養百樣人」，但如果係一個國家領袖，可能就會引來災難。日前，美國總統特朗普係社交平台，上載咗一張將自己化身為耶穌拯救眾生嘅圖片，並聲稱自己係一個醫生，正在「救治病人」，雖然佢事後刪除圖片，但呢張「耶穌圖」就引起熱議，特朗普亦有被批評「當自己係神」。其實，唔止話特朗普唔係耶穌，依家美國以至佢嘅苦況，更可能係連耶穌都「救佢唔到」。
早前，美國同伊朗曾經短暫達成共識，雙方同意停火兩星期，但經過大約21小時嘅會談之後，雙方談判冇達成共識，中東局勢隨即又再升溫，最新消息，係美國再度玩極限施壓，開始對伊朗實施封鎖，特朗普表示，如果伊朗嘅攻擊艇靠近美國嘅封鎖區，美軍會「消滅」佢哋；而頑強嘅伊朗，就警告如有軍事船隻靠近霍爾木茲海峽，都會被伊朗視作違反停火協議。換句話說，雖然停火兩周嘅限期未過，但雙方已經隨時再開戰。
睇到相關嘅國際新聞，筆者第一個感覺係，「美國喺度搞乜？」，如果第一輪談判冇結果，可以盡快展開第二輪、第三輪談判，雙方都未再談判，美國就一邊玩極限施壓、鎖喉，而且據報，美國係要將伊朗港口、霍爾木茲海峽等一次過鎖死。當伊朗封霍爾木茲海峽時，美國要求盡快重開，依家雙方未傾掂數，美國就嚟一招「不如我哋自己嚟封」，咁似乎唔係和談，係威脅，亦係挑釁再開戰嘅行為。
先唔講再封海峽或整區封鎖會影響到亞洲國家，美國嘅行為，同佢哋平時嘅做法一樣，就係玩霸凌，有部分讀者可能唔明白，點解雙方傾咗唔夠一日就拉倒，而且仍未展開第二輪談判。筆者睇咗幾日新聞，總體感覺就係美國所謂嘅「傾」，其實係「迫」，關於要求伊朗放棄擁核或保存濃縮鈾，某程度係迫伊朗放棄可以保命嘅手段；而霍爾木茲海峽要完全開放等，其實都係要伊朗放棄「命門」，當談判要對方先「放低所有保命武器」，讀者們會唔會信美國？可能會「信者失救」喎！
雙方戰事隨時再起，美國一方營造一種感覺，就係美國就嚟「打殘」伊朗，如果伊朗唔妥協，咁就會有大災難；伊朗冇制空權，美國海軍強大都係事實，但在伊朗而言，呢場可以係一場持久戰，美國同以色列繼續轟炸伊朗，伊朗適時還擊，時間再拖，伊朗要頂住，但美國同盟友嘅經濟就可能頂唔住，油價一直升，基本上已經開始影響到美國。從過去歷史可見，美國好少被敵方擊敗，但被「時間打敗」呢，似乎就有唔少例子。
以特朗普及其政府性格，一定會繼續「堅稱勝利」，但美國國內以至國際輿論，似乎就覺得美國陷入泥沼。筆者想講，特朗普要面子，但眼前如果美國能放低面子，可能之後會好過啲，當美國一步步越踩越深，戰事冇機會掉頭，經濟問題燒到美國本土，最有可能發生嘅結果，係美國共和黨喺中期選舉受到重創，到時唔好講特朗普點執政，可能國會停擺、要求罷免特朗普會成為常態。對特朗普同美國嚟講，搵機會閃，筆者覺得始終係「最佳策略」。
收藏
取消收藏
分享
