文/稀思路
「贏就係贏」、「輸都係贏」、「打和當然都係贏」，總之，特朗普就係贏！近日，全球關注嘅美以伊戰爭，終於得到喘息空間，美伊雙方同意停戰兩周，並將會喺巴基斯坦嘅協調下作出談判。唔同人對於戰爭，會有唔同嘅關注點，例如唔少亞洲國家，一定會諗霍爾木茲海峽係咪會重開，有啲就會關注以色列點樣繼續「背刺」伊朗。稀思路個人向來比較特別，關注到美國總統特朗普一個點，就係場仗明明無打贏，但成個美國政府都話「贏贏贏」，到底佢哋贏咗啲咩？定係已經畀伊朗嚇傻咗？
喺美伊停火之後，特朗普一如以往地自High（自我興奮），宣稱對美國而言係「徹底且完全的勝利」，白宮又高叫「這是屬於美國的勝利」；筆者睇比較近日嘅新聞，美國國防部長赫格塞思喺記者會上，仲聲稱係伊朗「乞求」美國停火，因為伊朗已經無法承受喇。不過，就有分析指出，一開始係特朗普單方面發動戰爭，依家又話「想緩和局勢」，其實特朗普本人都明白，呢場戰爭對佢不利，而且喺美國不得人心，耗資巨大，又無可靠嘅軍事計劃，所以直接「宣布勝利」。
表面去睇，讀者同筆者可以恥笑特朗普，明明冇贏，然後成個美國政府都當自己「打贏仗」，有少少瘋子Feel，不過，我哋不妨睇真啲又諗真啲，其實聲稱戰爭勝利，可能係特朗普等人嘅唯一選擇。成場仗，本身就唔係好關美國事，係以色列一心想掃除伊朗呢個「眼中釘」，以色列等咗咁多年，終於等到一個會聽佢哋「老點」嘅美國總統，特朗普依家中咗以色列計，仗又打咗超過一個月，聲稱勝利，悄悄撤退，算係美國「最好選擇」。
特朗普嘅「贏學」，本來係基於對委內瑞拉嘅勝利，令佢覺得可以喺伊朗「再嚟一次」，但兩者唔同嘅地方係，伊朗作為中東強國，唔係齋空襲就可以解決；而且，伊朗人民其實都幾反美，美國、以色列每刺殺一個伊朗領袖、官員，伊朗對美國嘅仇恨又加深一分，封鎖霍爾木茲海峽，某程度就係同美國玩鎖喉，就算係美國盟友，都唔敢貿然插手、加入戰團。依家雙方暫時停火，美國可以講足100次佢哋「勝利」，但無真正嘅戰略目標達成，贏咗啲咩呢？
4月8日，中國外交部發言人毛寧被問到，特朗普表示中國促使伊朗停火，問中方有咩回應，毛寧就指出，伊朗戰事爆發以來，中方一直積極致力於促進和止戰。王毅外長同相關國家外長先後26次通話。中國政府中東問題特使赴海灣同中東地區穿梭訪問，同巴基斯坦亦共同提出關於恢復海灣同中東地區和平穩定嘅五點倡議。作為負責任大國，中國將繼續發揮建設性作用，為恢復海灣同中東地區和平安全做出貢獻。老實講，當美國挑起戰事，而中國就幫手平息衝突嘅時候，邊個係負責任大國，真係高下立見！
唔知讀者們有冇留意，幾日前有個美國民調機構嘅調查，指出2025年中國嘅全球認可度，已經超越美國，民調結果顯示，中國領導力嘅支持率中位數係36%，領先美國5%，係機構近20年來，中國嘅全球認可度領先美國幅度最大嘅一次。筆者睇相關新聞，調查應該未計到去美以伊戰爭嘅時候，即係話，中國嘅全球認可度，可能唔止高於美國5%。本來想攞諾貝爾和平獎嘅特朗普，如今被外界批評為犯下戰爭罪行，美國嘅影響力亦漸漸減弱，當特朗普等人展現「贏學」嘅時候，真正贏嘅，其實係美國嘅對手先真。
收藏
取消收藏
分享
