【點新聞報道】近日有網民在社交平台發帖大投訴，指自己參加了某知名旅行社的復活節福岡6日5夜旅行團，人均$16,000（未計燃油附加費），原本諗住開開心心食蟹宴、浸溫泉，行Outlet，點知卻變成「真人版生存挑戰賽」。
事主在fb群組「開心分享及不幸中伏原創群組《視頻廣告，主張分享》」發文，分享不愉快的旅遊經歷，指6日5夜的行程中，有四晚住宿被更改，最後兩晚被安排入住新開張的「福岡王子大飯店百道濱」。惟事主對該酒店住宿體驗極差，包括Wi‑Fi無法正常連接、等咗成個鐘，主食先上到，侍應毫無歉意、房間地板採用劣質膠蓆，濃烈的甲醛味令本身有敏感的他「即刻想喊」。
事主不滿地點偏遠，「最搞笑係最後一日自由活動，酒店喺百道濱海邊，遠到離譜！除非搭的士，否則公共交通去天神/博多起碼要 1 小時以上……」，直斥「原本喺旺角住五星，你而家安排我去沙頭角住五星，係咪都叫『同級』呀？合理嗎？」
至於導遊的表現亦不濟，事主控訴導遊全程景點零介紹，「去到八千代座管理資料館・夢小蔵，22 個人入去坐晒度戇ＸＸ，冇人知做乜。」事主怒極反問：「你當我哋全部識日文定係要我哋自己做research先至跟團？」
然而，最難頂的是膳食安排，事主列舉行程中多餐食物質素欠佳，包括：牛肉丼肉硬到咬唔爛，又凍冰冰；原定蟹宴變自助餐，形容「冇一餐廢得過呢餐」。而最令人不滿是最後一餐Shabu Shabu火鍋，餐廳竟同時接待兩團人，「我哋要自己出去拎嘢食。牛肉未解凍，質素仲廢過佳Ｘ$35一磅嗰啲」，70多名團友圍住吧枱搶食物，場面猶如動物大遷徙，連日本侍應看到也忍不住發笑。
事主直言睇住成團人如此狼狽，內心只有一句：「你班人有冇良知㗎？做人有冇底線㗎？」事主表明不要求退款，只求旅行社主管或負責人親身飛去日本體驗一次相關的「尊貴」待遇。
收藏
取消收藏
分享
