文/稀思路
過去幾日係復活節假期，香港市民有一連五日嘅假期，唔少人外遊，亦唔少旅客嚟香港；相對於香港，英國嘅復活節就有一番完全唔同嘅「景象」。日前，有傳媒報道英國治安問題進一步惡化，而且針對零售業嘅「快閃式」搶掠更為猖狂，著名零售商馬莎百貨就公開聲明，形容店舖遭受嘅犯罪正變得「更猖狂、更有組織且更具攻擊性」。倫敦南部克拉珀姆（Clapham）過去一周連續發生青少年集結衝擊商舖事件，數十名黑衣年輕人透過社交平台策劃行動，馬莎百貨亦成為受害者之一。復活節變「搶掠節」，英國式節日真係「有意思」！
根據報道，大批青年利用復活節假期，喺社交媒體響應號召，喺克拉珀姆一帶集結、生事，從網上片段可見，涉事青年衝入店舖高聲尖叫、互相推撞，除咗惡意地將貨架上嘅食品推倒，仲搶走店內貨品，唔少商舖都受驚，直接閂門避開搶掠。馬莎百貨行政總裁忍唔住，甚至直接聯絡英國政府官員同倫敦市長，要求政府正視零售破壞同搶掠罪行；原來，該公司過去一年已經投入大量金錢加強保安，但自己加強保安，仍然唔足以自保。
面對嚴峻嘅治安問題，英國在野黨就有政客建議當局加強警力部署，除咗要進一步加強截查、搜查工作，仲應該利用實時人臉識別技術大規模拘捕涉案者。至於倫敦市長，雖然佢本人都承認其他地方認為「倫敦不安全」，但就批評有人乘機炒作，散播假宣傳以達到政治利益。不過，事實勝於雄辯，當「搶掠節」嘅片段喺網絡流傳，就算英國政府、倫敦方面想否認或淡化，都好難呃到其他人。
「無就去搶」，可能係英國青年嘅一種「時代選擇」，如果經濟好、收入足，相信英國青年都未必會「落草為寇」，英國經濟不景係事實，有報道指英國16至24歲「正在尋找工作」嘅青年比例已經升至16%，大約100萬人處於失業或失學狀態，數字係英國青年失業率首次高於歐盟平均水準。簡單嚟講，就係有人無工返，生計等出現困難，唯一方法就係「唯有去搶」。
英國經濟所影響嘅，當然亦不止於英國青年，最近稀思路喺網上睇到一篇新聞，有移英港人怒斥英國係「第三世界」，所以決心回流並形容為「地獄返天堂」，內容列出英國「三宗罪」，包括「飲食習慣難以適應」、「經濟負擔沉重」以及「社會文化難以融入」，唔計食物難食呢點，發帖者就話英國政府會想盡方法去「攞市民錢」，高稅率、唔同嘅告票等等，處處設下罰款陷阱。另外，就係英國「多難民」，而且令人覺得難以融入當地社會組織同文化，依家返到香港，簡直就係「由地獄返嚟天堂」。
無論係英國復活節變「搶掠節」，港人回流香港呢個天堂，其實都係有兩個面向，第一係英國嘅環境，似乎喺度惡化當中，經濟、治安以至社會環境都係；第二就係相比起其他地方，真係始終香港最好。筆者身邊有唔止一個朋友，其實喺英國讀書或進修期間，已經攞到英國永久居留，但佢哋都不約而同地表示喺香港生活最好，點解？因為喺英國同香港生活過，就會深深感受到，英國嘅「月亮再圓」，但講到真正生活，同香港真係好難比較；而且，英國人又幾時真係會當香港人係自己人呢？移民係好係壞，有時唔講主觀感受，客觀而言，都好難同各方面向好嘅香港比較。
收藏
取消收藏
分享
