【點新聞報道】近日有移英港男於社交平台發文，批評部分手足打份倉工都鍾意玩互相投訴、勾心鬥角，帖文掀起熱議。
該名移英港男於帖文中表示，「唔好意思呀，借個位發洩下。真係不吐不快」，其指「有時唔係好明，點解香港人打份倉工都要玩互相投訴」，港男更感嘆「人哋個個國家啲人都好團結，係唯獨是香港人咁鍾意玩勾心鬥角」。
樓主無奈指，「打份倉工賺個雞水（碎）咁少，過生活啫，投訴咗又無錢分」，並質疑「明明咁辛苦過到嚟生活，呢個國家都已經唔係話好好㗎啦。返工都仲要搞呢樣個樣，唔使咁複雜呀嘛？」
帖文掀起熱議，許多同路人表示贊同，「絕對認同，仲要亂搞婚外情，個個忘記初衷」、「香港人嘛，就係咁！睇開啲啦，嚟到英國就遠離香港人啦」、「因為全部都係中產，以前喺香港玩慣辦公室政治勾心鬥角」、「返文職一樣，唯獨是香港人鍾意玩勾心鬥角，仲好叻two-faced扮係team player」、「辦公室政治延伸到倉庫政治」、「太多X街啦，有啲仲攪（搞）埋人哋老公、老婆」、「如果團結嘅話，我哋而家應該仲喺香港」、「住在英國（嘅）香港人就係咁㗎啦，自己人打自己人，見到外國人就死晒狗，又喜歡玩杯葛（Boycott）自己人，乜嘢都爭，乜嘢都搶，又貪心，又假，真係要遠離D香港人」、「成日話香港人幫香港人，永遠迫你認同佢，唔認同就係你錯」。
亦有網民直言，「得罪講句，有料都唔駛（使）做倉啦，都係出面搵唔到工先喺倉度長做⋯，咁無料嘅人最驚咩？就係驚人叻過佢，搶咗佢（嘅）地位」。對此，樓主則回應稱「咁喺度要搵份老本行真心唔易嘅，連Local嘅人都要做倉，又唔係個個都無料嘅。」
收藏
取消收藏
分享
