【點新聞報道】香港生活方便，屋企爆水喉，落街就可以搵到師傅上門維修。不過，一對移民英國的夫妻就大鑊喇！早前諗住用花園水喉洗車，點知搞到成個廚房水浸，以為閂咗水掣就冇事。原來好戲在後頭，早兩日廚房水龍頭竟然彈咗出嚟，啲水好似噴泉咁狂噴，人妻當場忍唔住嗌咗出嚟，好不容易才關掉總掣，直言「過咗好困難嘅一日」。
該名移英人妻在社交平台threads發文講述屋企爆水喉的慘況，「話說早前，老公用花園水喉洗車，洗完入屋就發現成個廚房水浸，我哋第一時間懷疑外面個水喉爆咗，即刻關咗水掣。得出一個結論只要我哋呢一世唔再用佢，應該可以平安無事。」一家人自以為避過一劫，繼續過住安穩生活。
點知，慘事一宗接一宗，人妻續指「點知早兩日，我喺廚房突然聽到啲怪聲，轉頭一望，水龍頭竟然彈咗出嚟，啲水好似噴泉咁狂噴。當時成屋得我一個，其實我都知就算大嗌都冇人會嚟救我，但最後我都係忍唔住，嗌咗出嚟，然後一邊慌一邊搵水掣，好不容易才關掉總掣，然後就開始抹地再抹地。」人妻憶述，當時心情差到不得了，「返工已經好攰，仲要善後，嗰一日全屋冇水用、冇得沖廁、冇得洗手、冇得煮飯」，大嘆「過咗好困難嘅一日」。
不過，人妻有嘅係「阿Q精神」，話黑仔事件最後竟然變咗幸運事件簿喎。原來，人妻在街頭撞到舊識，對方是一個專業師傅，更出手幫她維修，「今日喺街無啦啦撞到個朋友，佢係一個專業師傅，在英國開咗間家居工程，我順口問下而家個情況點算，最後佢出手幫我搞。」經過今次教訓，人妻有感而發地表示，「嗰一刻我先明，有啲嘢真係唔係個個都做到，專業嘅嘢應該交返畀專業嘅人」，而她的丈夫更是想念香港的生活便利，「我老公噚日仲喺度呻，點解英國唔似香港。落街就可以搵到五金師傅上嚟整」。
結果，帖文不但沒有博得同情，反被一眾網民揶揄「明知漏水唔整係乜玩法？」、「由此可見其實好多港人，對呢啲家居生活技能冇乜意識同知識，可能身邊啲親戚都係返白領工」、「唔駛自己識整水喉，但明知有潛在問題唔處理就響香港都係生活白痴啦」、「成個故事都表現你還是用香港心態生活，真的不可思議！看龍頭就知已經漏水很久，哎！有排捱！」、「早啲畀錢解決咩事都冇」、「因為香港係溫室，除咗畀錢人，香港人係唔識自己解決問題」。
收藏
取消收藏
分享
