【點新聞報道】草蜢將於4月26日起，於紅館舉行七場「GRASSHOPPER THREE IN LOVE草蜢演唱會2026」，密鑼緊鼓閉關綵排之際，日前突擊尖沙咀一戲院，現身Fans包場睇之前「RE：GRASSHOPPER CONCERT 草蜢演唱會」Blu-ray聚會。與全場Fans在觀眾席一齊又唱又跳，揮動手燈、應援名牌和橫額，三小時足本播放，猶如置身草蜢專屬CantoPop Disco般震撼。草蜢更即場向Fans下「打Call密令」和Dress Code，約定月底紅館演唱會全場一齊玩。
蔡一智說：「我哋今日嚟戲院唔係嚟睇賀歲片，係睇我同二少（蔡一傑）花咗好長時間去剪輯，啱啱推出嘅演唱會的Blu-ray碟。我哋好少拍電影㗎嘛，能夠上戲院真係一件好開心嘅事！」Fans自發包場在戲院睇演唱會，令草蜢好感動。
蔡一傑（傑少）說：「睇到自己喺大銀幕上，好好Feel，好似睇4D！」蘇志威說：「現場尖叫聲大過戲院音響，厲害！」觀眾席上落力跳唱的蔡一智笑言：「原來我都係草蜢Fans！」傑少表示從未試過在戲院內盡情唱歌跳舞，感覺新鮮，更建議將草蜢演唱會在各大戲院上映，蔡一智承諾會拉隊謝票。Fans高舉「台上你最美最震撼 台下撐到尾我本分」橫額，引用草蜢《老的辣》歌詞打氣，草蜢表示感動。
不足一個月，草蜢將再踏紅館舉行全新演唱會，蔡一智向Fans下「打Call密令」，說：「當我哋唱《永遠愛着你》，你哋就拖住隔籬嗰位觀眾，無論識唔識，都拖手和舉起手大合唱，大家記住我哋今年嘅暗號，讓成個紅館充滿LOVE！」傑少預言單身Fans可能「拖出好姻緣」。
蘇志威就溫馨提示入場觀眾Dress Code，說：「希望大家衣着打扮以紅色、粉紅色『喜慶』色系！」至於外傳草蜢每場特別嘉賓名單，蘇志威大賣關子，說：「總之佢哋都係重量級！」
（點新聞特約記者陳惠芳報道）
收藏
取消收藏
分享
