【點新聞報道】移英「黃師」、網名為「香港老師也移民」成日吹噓英國生活，點知最近被人踢爆佢哋兩公婆喺當地的快餐店做西客，畀少少錢就巴巴閉，打躉打足五個鐘，結果被餐廳職員趕走。
fb專「自由之水」日前發文踢爆移英「黃師」的西客行為，佢哋兩公婆去快餐店Subway 買一杯嘢飲 + 一件小食就霸住人啲位五個鐘溫書，被經理趕咗幾次都仲磨爛席，直到經理話要搵保安人員，佢哋先肯走，直指「真係影衰晒移英港人！」
帖文指出移英「黃師」兩公婆被下逐客令的經過，快餐店店員：「先生小姐、你哋已經坐咗五個鐘，唔該你哋離開，我哋呢度係食肆，唔係俾你哋咁樣喺度溫書㗎！」移英「黃師」反駁指：「我係客，叫咗一杯嘢飲同一份snack，點解唔可以坐喺度呀？何況你間鋪都無客，我哋又無嘈到人，點解要我哋走？」
快餐店店員篤爆移英「黃師」已連續幾日打躉，「先生小姐、我睇返 CCTV 見到你哋前日同噚日已經嚟過叫少少嘢就坐足全日，唔該你哋快啲離開，否則我會call 保安請你哋走」。
結果兩公婆才死死地氣走人，不過仍跌落地揦番揸沙話：「有無搞錯？！我哋只係前日嚟過叫兩杯嘢飲坐幾粒鐘之嘛，明明噚日都無嚟，想老屈我呀？哼，走咪走，我返去一定上網寫臭你哋！」
事後移英「黃師」果真到google留下該快餐店的負評，並詳細講述自己的西客行為。不少網民揶揄「真係好Ｘ樣衰，cheap到人哋subway，仲要俾人趕走」、「佢好意思買杯嘢坐足5個鐘，歪理滿天飛」、「好心唔好咁厚面皮啦，影衰晒香港人」、「西客永遠唔覺得自己西」、「好心佢咁Ｘ就咪話晒俾全世界知啦! 」、「自己做大種乞衣仲要理直氣壯劣評人真係畜生嘅行為」。
而移英「黃師」的英文水平，被網民嘲「小三程度英文」、「仲好意思寫出嚟，英文又差，坐人地方咁耐仲大條道理，歪理當道理」、「佢啲英文真係食得蕉」、「Me & my friend… Ｘ佢老味咩英文嚟，仲話做老師…」、「中文直譯英文，柒出國際」。
有網民就好奇移英「黃師」一向自誇高薪厚職、住大屋養番狗，「點解有千呎大屋都要出街溫書？兩公婆出咗街邊個睇住兩隻狗？」、「因乜事要出街溫書？」、「佢D狗真係好慘」。
收藏
取消收藏
分享
