文/稀思路
美國同以色列持續襲擊伊朗，牽一髮動全身，除咗影響全球石油供應之外，其實戰火一樣燒到美國，因為喺美國本土，其總統特朗普將美國捲入一場「唔知為乜」嘅戰爭，不斷燒銀紙，又波及到美國經濟；所以，美國日前就出現咗第三波「不要國王」（No Kings）示威，預計總參與人數有成900萬人，相較之前兩次「不要國王」示威，人數更多，範圍亦可能更廣，美國示威者嘅目標其實好簡單，就係反對特朗普！
喺當地時間28日，「不要國王」嘅示威浪潮席捲全國，美、以襲擊伊朗係其中一個主旨，但其實美國民眾所反對嘅，仲包括特朗普嘅移民政策，以至係汽油、食品價格居高不下等民生問題；美國50個州，同埋華盛頓、紐約、洛杉磯、費城、波士頓等主要城市，都有大批示威者上街反對特朗普。據傳媒報道，喺歐洲、拉丁美洲、澳洲等地方，都有人響應「不要國王」示威，有人譴責特朗普濫用權力，更有人直指特朗普行為「非法、不道德、魯莽、不負責任」。
睇返傳媒報道，有啲示威者公開講嘅嘢，其實都幾中point（直擊要害），有示威者話，曾經美國係令佢哋所有人引以為傲嘅國家，但依家佢哋已經淪為全世界嘅笑柄；亦有退伍軍人坦言，自己為「山姆大叔」（美國）效力咗接近40年，但依家嘅局勢，簡直就係一場噩夢。從示威者嘅標語亦可見，喺部分人心目中，特朗普就係一個獨裁者。
之所以出現第三次「不要國王」嘅反特朗普行動，最大原因，一定係特朗普執意向伊朗發動戰爭，由上月底到依家，戰爭已經持續咗足足一個月，本來美國諗住極速「解決」伊朗，點知伊朗頑強，一面還擊，一面又封鎖，特朗普本來想威嚇伊朗會攻擊其能源設施，點知伊朗完全唔退縮，特朗普最後又搞到自己「TACO（退縮）」。
依家美、以同伊朗嘅戰爭，已經去到一個位，令美國進退不得，如果繼續轟炸伊朗，伊朗肯定會大力反擊，包括攻擊美國喺中東嘅基地同一系列設施；如果派地面部隊，只怕會斷送美軍「寶貴嘅人命」。若然特朗普唔將行動升級，最可能出現嘅結果，就係美國宣稱已「取得勝利」，然後退兵，不過咁又產生另一問題，既然如此，美國當初做乜「手多多」，走去突襲伊朗呢？
之前有分析指出，特朗普決定突襲伊朗，其實都係出於政治考慮，依家睇返中東局勢，特朗普極可能係賠了夫人又折兵。根據美國福斯新聞網喺3月嘅最新民調，特朗普嘅不支持度已經到達59%，係個人喺兩個總統任期最差嘅紀錄，即係大部分人都認為，佢攻擊伊朗係錯誤決定。如果反特朗普情緒持續升溫，今年年底嘅美國中期選舉，相信結果都已經係意料之內。
無論係繼續進攻、地面進攻定係「TACO」，都無可避免令特朗普管治威信受損，但筆者都係覺得，襲擊伊朗嘅行動越早結束越好，戰事再持續，就繼續會有平民受到傷害，特朗普嘅政治利益，唔能夠凌駕於平民嘅性命之上。如果美國、以色列同伊朗再進一步，攻擊對方能源、食水等設施，整場戰事可能會進入不可逆轉嘅死局，今次，稀思路都贊成特朗普「TACO」，反正任何事，贏定輸佢都會話「自己贏」，都係減少各方損失最好。
收藏
取消收藏
分享
