【點新聞報道】近日有女食客於社交平台發文鬧爆一間連鎖日式餐廳，指於刺身外賣中竟三次吃到魚骨，向店家反映後遭廚房師傅質疑造假拒退款，帖文掀起熱議。最後事主上傳家中的閉路電視片段，涉事餐廳亦聯絡事主解決問題，據悉涉事廚師已被開除。
該名女食客於社交平台發文發相，怒斥「希望貴公司俾到一個解釋我，你大埔分店嘅師傅話我屈Ｘ佢，覺得我係為咗想攞個全單退款$164.8而誣衊佢，變三條魚骨出嚟呃退款！另外想問吓網民，我手上嘅證物可以點樣做」。事主表示，經外賣平台點餐，進食第一塊時就吃到一條細長的魚骨，「當時我未食其他，已經即刻喺keeta反映申請退款$16.8，因為我冇諗過之後嘅三文魚都會有骨，所以淨係揀咗部分退款」。其後女食客吃到第四塊時又再現細長的魚骨，緊接着食用吞拿魚蓉丼時又吃到粗的魚骨。事主斥責，「我直接喺Keeta申請全單退款，我驚哽死自己」，惟遭餐廳拒絕退款。
事主與店家通話，師傅稱正常吞拿魚蓉不會有骨頭，並且強調「佢有檢查晒所有食材冇骨先出貨」、「不接受退款」。師傅亦質疑事主「做咁多嘢純粹都係想攞退款啫」。事主批評餐廳師傅態度，「而家係暗示我講大話？咁我眼前嘅魚骨係乜Ｘ？（我）買條魚返嚟特登影落去？咁吞拿魚蓉骨又點解釋？我生平未試過食嘢食到有異物，仲要諗辦法證明自己冇講大話cls」。
帖文掀起熱議，不少網民留言表示：「佢都傻嘅，佢自己挑唔好俾咗人仲要話人。唔通我為咗百幾蚊整嚿魚骨屈佢咩，作為一個廚師應有嘅態度佢都冇」、「咁癲，唔通嗌外賣都要拍開箱」、「因為拖羅蓉好大機會佢都係用急凍貨，正常真係唔會有骨」、「報食環等佢停業一陣考慮下點解決，俾d咁嘅嘢食人同謀財害命冇咩分別」、「其實啲人真係好蠢，退咗錢咪一了百了」、「呢啲吞拿魚蓉一盒盒叫返嚟，佢都唔知有冇骨」。
事主其後再留言交代與涉事餐廳交涉的事宜，據悉涉事廚師已被開除，「貴公司表明已中止與該師傅的合約，並承諾日後唔會再錄用呢位師傅於集團任何分店工作。我尊重貴公司嘅決定，係溝通過程中態度誠懇，承認錯誤。希望公司日後繼續重視顧客感受」。
收藏
取消收藏
分享
