文/稀思路
「我們已經取得勝利」、「我們正與伊朗談判」... 特朗普嘅語言偽術，最厲害嘅地方，唔係佢試圖去呃全世界嘅人，而係佢「連自己都呃埋」，美國同以色列向伊朗發動襲擊，已經踏入第四周，開頭幾日，基本上美國總統特朗普已經不斷揚言「取得勝利」，而美國方面又聲稱已經摧毀咗伊朗好多目標，但摧毀得嚟，伊朗仍然可以不斷反擊，對美軍基地以至以色列造成一定傷害。本來，特朗普已經作出最後通牒，要伊朗開返霍爾木茲海峽，否則會攻擊其能源設施，但近日特朗普「又縮了」，到底依家嘅特朗普，不能進又不能退，搞咩？如果對伊朗久攻不下，美國喺某程度上，其實都算係打敗仗了。
由美國、以色列斬首行動當中，由戰事一開始，就係一種極限施壓，不過特朗普嘅如意算盤打不響，因為美、以嘅行動，無令伊朗退縮，反而令伊朗頑強地抵抗，喺比較零散嘅新聞當中，讀者可以睇到美軍基地受襲，甚至有戰機被擊落。鏡頭睇唔到嘅，可能係以色列國內都受到重創，因為法律限制以色列入面嘅影片傳播，但其實以色列不同地方都有受到襲擊，美、以係佔優，但又唔係絕對壓倒或絕對優勢。
今個星期初，喺美股開盤前，特朗普就喺社交平台，聲稱美國同伊朗進行咗良好而富有成效嘅對話，佢會命令軍方暫停對伊朗發電廠同能源基礎設施嘅任何軍事打擊，為期5日。據報，特朗普咁做係因為佢覺得美國可以解決中東嘅敵對行動，而且對呢種可能性感到樂觀。更現實嘅考量，當然係霍爾木茲海峽被封，對美國喺亞洲嘅盟友，造成極大影響。
不過，就如筆者喺上面所講，特朗普講嘅嘢，有時唔止呃人，係連自己都呃埋，因為特朗普講完會同伊朗談判，伊朗就公開否認，表明冇同美國進行任何談判，伊朗伊斯蘭議會議長卡利巴夫仲批評特朗普「虛假新聞的目的是操縱金融和石油市場，以此讓美國和以色列擺脫其深陷的泥潭」。從戰事開始，美、以氣勢如虹，一副斬首行動完全勝利嘅姿態，但戰事持續，到特朗普出口術話「雙方談判中」，依家到底係邊個急？結果好明顯。
如果講石油，美國本身唔會急，因為美國自己就係全球其中一個能源產國，所以讀者們睇新聞，應該唔會睇到好多美國國內欠缺石油嘅情況。但係，美國有能源，佢亞洲啲盟友冇，喺日本，日本政府就宣布將會喺本周釋放一個月量嘅國家石油儲備；而喺韓國，已經因為中東局勢同能源緊張提前啟動緊急應對機制，會實施公務車「尾號分日限行」，即係車輛要分日子限制出行。筆者前一、兩日睇電視新聞，澳洲唔同地方已經開始出現石油搶購潮，部分油站「冇油入」，不同嘅美國盟友，講到底都要「多謝」特朗普。
睇美以伊戰爭，筆者覺得最重要仲係睇基本面，美、以係可以空襲摧毁伊朗好多目標，但如果唔派地面部隊，美國好難用突襲委內瑞拉嘅方式，喺伊朗搞政權更迭。如果派地面部隊又如何？伊朗地勢複雜，呢邊有山脈，另一邊係沙漠或荒地，美、以如果喺唔廣闊嘅入口地面進攻伊朗，而伊朗又有幾十萬軍隊「等緊美國」，結果會點？所以特朗普進退不得，時去時縮，其實係反映佢已經陷入困境。
世界紛亂，好在始終有中國擔當起和平同穩定嘅角色，中共中央政治局委員、外交部長王毅，24日應約同伊朗外長阿拉格齊通電話，伊方表明致力於實現全面停戰而不僅僅是暫時停火，霍爾木茲海峽對所有人開放，船隻可以安全通過，但正在交戰的國家不在考慮之列。王毅就重申，強調所有熱點問題都應通過對話談判解決，而不應使用武力。中方將繼續秉持客觀公正立場，反對侵犯別國主權，積極勸和止戰，致力於地區和平穩定。筆者覺得，美國不斷威脅，伊朗不為所動；但中國出手就有截然不同嘅結果，中國同美國嘅影響力同名望，都係中國比較可相信、可合作。
收藏
取消收藏
分享
