【點新聞報道】草蜢三子參與HOY大型音樂企劃《歲月如歌》，將於周日（22日）晚播出。他們除了唱自己的經典作之外，還演繹了師傅梅艷芳及陳百強的作品。
草蜢是次受訪更互爆秘密。談到剛剛完成上一個巡迴演唱會，已經馬不停蹄籌備最新的紅館個唱，三位即表示這是他們的養生方法：「我哋做演唱會就係我哋養生嘅時間，做完一次就後生一次！好過做facial喎！準備演唱會時，每日我哋就係做運動、跳舞、排舞、練歌！咁仲唔係養生！？」問到入行40年，一智就笑言以前覺得非常老：「So old！即係以前覺得就算唔退休呀，都自動退休啦！都跳唔郁啦！點知原來只要自己唔放棄就會做到。好似我咁，後生嘅時候跑唔到10公里㗎！過咗60歲之後反而仲跑到半馬！呢啲係咪叫做回春呀？」
演唱會主題名為「Three in love」，問到互相覺得對方可愛之處，傑仔竟然覺得核突：「我哋大大話話都識咗60年，會唔會覺得對方好cute？我想嘔呀！哈哈哈！不過其實都有好可愛嘅時候嘅，好似蘇志威咁，平時好少同我飲酒，有一次佢飲大咗！係咁捉住我嚟錫！你哋睇落好似好sweet，但係我就會好似如來神掌咁樣推開佢！好鬼肉麻囉！」
蔡一智就笑談傑仔經常「麥兜」上身：「佢成日去到雲吞麵舖就叫一啲唔應該有嘅嘢！好似麥兜咁，人哋話，今日賣曬雲吞呀！咁佢就會話咁雲吞麵啦！蔡生麵都買曬啦！咁水餃麵呀！總之就係笑死街坊啦！」蘇老闆亦大爆蔡一智係「雙面人」：「我哋開會佢就好正經嘅，但係當佢個仔一打來佢就好sweet。」蔡一傑插嘴：「佢係對住你好硬，對住個仔就好軟，我對住佢？真係乜都硬呀！」期間主持人笑到眼睫毛都飛脫，傑仔以為是烏蠅：「你知啦，我老花呀嘛！哈哈哈。」
（點新聞特約記者陳惠芳報道）
收藏
取消收藏
分享
