文/稀思路
2019年嘅黑暴運動以失敗告終，攬炒派一眾政客，要找數嘅入獄「找數」，潛逃嘅潛逃，有人可能會諗，一啲攬炒派政客潛逃在外，可能「食好住好」，又有外國勢力照顧。不過，外國勢力喺黑暴時利用香港嘅攬炒派政客，同之後係咪要善待佢哋，可以係兩回事，好似同黎智英沆瀣一氣嘅「攬炒巴」劉祖廸，最近就公開訴苦，話自己申請英國公民入籍被延誤9個月，擺出一副「慘樣」；但其實，佢係一個特區政府通緝嘅重犯，哪來的自信，要外國政府畀佢盡快入籍呢？
話說，劉祖廸最近接受英國媒體訪問，話自己申請入籍英國被延誤，因為政府官員表示仍然評估緊佢係咪符合「良好品格」要求，心情低落嘅佢，因為延誤入籍而「每天都感到焦慮」，話自己睇到英國政府嘅偽善，一方面話「支持港人」，但實際並非如此，甚至批評工黨政府「人格分裂」。
唔知係咪因為谷氣咗好耐，劉祖廸似乎就有恃無恐咁批評英國現任政府，佢之後喺社交媒體，話自己一直處於懸而未決、無限拖宕嘅困境；過去一段日子，佢一直嘗試質問內政部為何同期申請嘅其他人，申請都喺2至6月個月獲批，而佢呢？申請就石沉大海，相比之下，前一屆英國政府，就已經好快咁批咗佢嘅永居（ILR）申請。
劉祖廸認為，自己作為「黎智英案內被點名逾200次嘅直接受影響、被追捕人士，偏偏面對內政部雙重人格百般刁難」，筆者就覺得重點嚟喇，劉祖廸用自己嘅視角，話自己被英國政府刁難，但事實係，佢係香港特區正在懸紅通緝嘅重犯，一個喺香港涉嫌犯下嚴重罪行嘅人，點解覺得自己去到外國，外國一定要關照佢、畀佢入籍呢？
睇睇香港警務處嘅公開資料，1993年出世嘅劉祖廸，「於2020年7月至2021年6月期間，透過各類平台及建立『攬炒團隊』，持續請求外國對中華人民共和國及香港特別行政區進行『制裁』、封鎖或採取其他敵對行動」，佢喺2020年1月離港，2024年，保安局局長根據《維護國家安全條例》條文刊登憲報公告，指明佢係被通緝人士、指明危害國家安全罪行的潛逃者。
關於劉祖廸，如果讀者們將佢同黎智英嘅資料都睇睇，會發現黑暴期間，黎智英同劉祖廸有見面，黎智英提出要同「攬炒團隊」合作，劉祖廸回覆願意合作，而且當劉祖廸帶領所謂「游說活動」時，黎智英亦表示「致敬」。一個同黎智英關連極深嘅通緝犯，憑什麼要英國一定要畀佢入籍？論道義或道德責任，其實英國同香港已經無關係；論英國政府、政客嘅特性，劉祖廸覺得英國政府雙重人格，但對英國政府而言，劉祖廸其實都冇利用價值喇，何必要優待佢？包括劉祖廸在內嘅攬炒派，被用完即棄，合情亦合理。
收藏
取消收藏
分享
