【點新聞報道】不少港人家長講起移民的理由，都話為了子女獲得更好教育，不過，有移民英國的港爸就大彈英國數學教育差，話帶兩個囡囡移民，係希望佢哋有個快樂童年，但快樂唔等於放棄，反問「咁點解移咗去英國，就要接受數學可以差啲？」。
該名移英港爸一家四口移民英國，兩個囡囡現時分別10歲同8歲，他日前在社交平台threads發文大彈英國數學教育，指「好多人移咗英國就話：『唔使咁緊張啦，英國教育唔係咁。』係既，英國教育唔係咁。但英國數學全球排名你查過未？」。
樓主認為教育不能得過且過，「我帶兩個女嚟，係希望佢哋有個快樂童年。但快樂唔等於放棄。最好當然係能夠『取香港嘅長處，補英國嘅短板』」。樓主反問「你會因為移咗去日本，就覺得唔使學英文嗎？咁點解移咗去英國，就要接受數學可以差啲？」。
樓主指香港與英國教算術方法不同，「英國學校教加數，唔係教你直式。係教你number bonds。」事實上，樓主曾試過用香港的方法教女兒數學，但卻被女兒拒絕，「被我女一句 "But that's not how my teacher does it" 彈返轉頭。」
帖文吸引不少移英家長留言，大家異口同聲表示用香港方法教子女數學，「個仔 Year 1，我用最古老既方法教佢背乘數表，我個仔知道我嘅教法同學校唔同，我同佢講學校講乜你照聽唔洗反駁，爸爸教嘅係另一種方法但計得更加快，佢又好似無反抗」、「我用返HK進度教佢，所以好少有老師唔係咁教嘅情況，同埋唔好睇佢d功課，睇見就眼火爆，學晒佢哋d蠢方法！ 」、「佢哋有話老師唔係咁教，但我話所以啲同學仔啲數咪一pat屎咁囉，咁佢又好認同咁講：咁又係所以佢喺學校用學校教嘅方法，其他時間一律香港計法。」
不少網民都話英國的數學真心弱智，「諗起去超市買野當賣單13鎊，你比23鎊個職員，個職員會退返3蚊比你話比多咗，再慢慢找7鎊比你 」、「買嘢試過10鎊加12鎊個staff要用計數機，好懷疑英國人平均數學水平係咪真係有9歲」、「啲本地人係死腦筋，無計數機根本唔識計數」。
收藏
取消收藏
分享
