文/稀思路
美國總統特朗普嘅品德，就係「不講武德」，這邊廂聲稱委內瑞拉毒品流入美國，轉頭原來係要突襲委內瑞拉，強搶委國嘅石油資源；然後，當美國仲同伊朗談判緊，美國就聯同以色列對伊朗發動不合法、無道德嘅戰爭。從近日戰場嘅新聞，外界可能會覺得美國以至特朗普「形勢大好」，壓住伊朗嚟打，但其實，真正嘅戰場，唔止係伊朗本地，亦關乎整個中東以至美國國內形勢，特朗普如果唔能夠喺短期內令伊朗屈服於其淫威之下，最後「兵敗如山倒」嘅，可能會係特朗普本人。
當全世界嘅焦點集中喺伊朗嘅戰爭時，其實美國內部已經暗流湧動，根據最新新聞，美國國會參議院3月4日以53票反對、47票贊成的結果，否決一項旨在限制特朗普對伊朗採取軍事行動權力嘅決議案。今次投票，基本上係以黨派勢力各自投票而得出嘅結果，因為共和黨喺參議院佔優，所以相關議案受到否決。
不過，如果睇真啲相關新聞，其實民主黨可謂來勢洶洶，多名民主黨參議員直斥特朗普將美國拖入一場非法衝突。除咗民主黨齊聲反對特朗普，亦有共和黨議員表示，如果軍事行動持續數周以上，或美國決定派遣地面部隊，總統可能需要尋求國會授權。北卡羅來納州共和黨參議員蒂利斯都警告稱，國會後續必須就授權使用軍事力量進行嚴肅討論：「我們需要盡快弄清楚最終目標是什麼。」
有議員喺參議院指出咗「重點」，就係連美國國內，都唔係好知道特朗普發動戰爭嘅目的「為乜」，當參議員有咁大疑慮，美國社會當然就更加係「唔明白」咩事，根據路透社喺3月1日進行嘅民調，就喺美國聯同以色列轟炸伊朗時，雖然絕大部分美國受訪者都知道相關襲擊，但係喺受訪者當中，就只有27%人支持美國襲擊伊朗，反對者有43%；即使喺共和黨支持者當中，贊成特朗普攻擊伊朗嘅受訪者，只亦係略多於一半。有共和黨支持者認為，如果攻擊伊朗導致中東、美國人被殺或受傷，佢哋更加唔支持特朗普嘅軍事行動。
可能喺外界眼中，特朗普「形勢」唔錯，但睇睇美國國內嘅反對聲音，就知道即使喺國內，都有好多人反對特朗普，喺網上，筆者就睇到有學者分析，美國將會「輸掉戰爭」，當中原因，因為呢場戰爭係一場消耗戰，伊朗已經為戰爭準備咗好耐，之前為期12日嘅戰爭，當時伊朗就審視過美國同以色列嘅打擊能力，並對新嘅攻擊作好準備；當伊朗重點針對區內能源設施等等，時間一拖落去，中東其他國家都受影響，可能最終「最為受壓」嘅係美國本身。
對於伊朗嘅策略，筆者唔特別評論，但係美國、以色列瘋狂轟炸伊朗，逼到伊朗全力還擊，問題在於，伊朗可能耐打，但美國係咪又經得起各種耗損呢？美國唔係第一次發動或參與其他國家嘅戰爭，如果時間一拖長，美國同盟友嘅經濟資源寶貴，甚至美國軍人嘅生命都「特別矜貴」，呢場戰爭嘅重點，仲關於特朗普可以支持幾耐、承受幾多壓力。
特別重要而唔可以忽略嘅一點，就係從頭到尾，特朗普發動戰爭都冇得到國會授權，佢自己發動咗一場不合法戰爭，非法戰爭可以持續幾耐，係一大問題；而且，當伊朗學生等平民不斷無辜地被美、以軍隊殺害，世界各國嘅輿論，自然亦會對特朗普不利。特朗普係「形勢好」定係「敗象呈」，唔止睇表面，應該深入分析各個層面嘅現象。
收藏
取消收藏
分享
