【點新聞報道】貴圈真亂！英國港人移民圈近期接連爆出桃色風波，又有移英人夫為上位，更變陳世美，狠心拋棄糟糠之妻。有指該人夫入職不久，同太子女愈行愈理，搞到老婆踩上公司對質，最後人夫決定離婚，仲氹得掂個太子女，求埋婚㖭。不少網民都剝花生，揶揄男主角「好上進」、「真叻仔」，又笑指故事「好勵志」咁話。
有移英網民在社交平台threads大爆港人移民圈八卦，話「曼城港男偷食白人中女上司」。樓主表示，該名港男年約30歲、是新入職同事，「公司嚟咗新同事，香港人嚟，30頭到，佢真係勁啦，未過probation三個月唔夠就令好多人識佢。」
樓主指該名港男入職不久，同單身太子女愈行愈理，「話說頭一個月佢啱啱入嚟無乜嘢，但之後有其他同事成日見到佢收工約老闆個女（40幾歲，單身），再之後返工收工都坐太子女架車，佢同人講話咁啱住附近，人哋車埋佢」。
豈料東窗事發，該名港男被發現原來有老婆，「點知有一日有另一個女人踩上嚟，原來係個男人嘅老婆，兜口兜臉問佢係咪出軌，當時太子女都在場，好驚愕咁嘅樣，個男人就係咁叫個老婆唔好亂講/快啲返屋企之類」。
最後他更拋棄糟糠之妻，投入太子女的懷抱，「後尾聽返同事講，個男人最後搞咗離婚，仲氹得掂個太子女，求埋婚添，然後就調咗去另一個子公司」。
不少網民紛紛留言揶揄「男主角」，「白女4x，外表應該過50⋯ 實力錢嚟，唔係個個食到呢口飯㗎」、「香港人真係好能幹」、「咁係人哋本事啫，辛苦錢嚟㗎 」、「真叻仔，呢種實力嚟㗎，你估個個溝到太子女？」、「你唔可以唔佩服佢嘅上進心」。
有網民則不齒「男主角」的行為，「我覺得香港人咁做法好不擇手段，為上位連自己老婆都離埋婚」。
收藏
取消收藏
分享
