文/稀思路
近年，英國國內有社會共識，就係難民同移民充斥整個國家，佢哋唔單止佔用社會福利，甚至可能會搶埋英國本土人嘅飯碗，所以英國政府由政客打開口牌，到相關部門出諮詢文件，基本上主調都係要「郁」難民同移民，點郁同幾時郁，可能只係時間問題。近日，難民似乎率先成為炮灰，英國內政大臣宣布，即日起落閘收緊難民政策，所有新嘅難民申請，獲批後唔會再自動取得永居資格，改為每兩年半續期一次，如果申請者原居國被視為安全，亦會被遣返。咁即係點，即係英國政府已經出手處理難民問題，Who's next? You Know!
根據英國喺2日嘅公布，由即日起，所有新難民都會變成臨時性質，定期審視。按照官方說法，英國咁做係參考咗丹麥嘅「成功經驗」，因為丹麥採取類似嘅措施，喺過去十年將難民人數減少超過九成，英國參考丹麥經驗同時，又強調英國會繼續保護逃離戰亂嘅人，不過會加強邊境管控，避免助長人口過多。
關於英國收緊難民政策，其實都有一啲啟示，首先係筆者覺得，英國政府依家係玩緊「先易後難」，難民同合法移民，處理前者先，社會大眾會支持；理順完難民問題，就可以借勢宣布埋點處理移民，之前英國特意就相關問題作諮詢，其實諮詢得，多數會郁埋移民，只係力度與強度嘅問題。
推深一層，依家英國政府推出嘅難民政策，其實措施係唔包括舊申請，即係舊申請權利依舊；如果相關做法亦應用喺移民包括港人移民上，理應港人BNO「5+1」移民都可以穩定啲，唔使符合將來嘅新要求。不過，英國政府或政客都講過，語言、收入等要求，其實都係證明移民有融入社會，所以英國政府最後點處理舊一批移民，可以繼續觀察。
之前筆者寫過，唔少港人已經準備回流香港，數目可能仲係兩萬人或以上，相關調查嘅真實性，筆者唔敢講，不過，依家移英港人，所面對嘅係一種高度嘅不確定性，基本上瞓身（all in）晒所有資源晒英國，但就可能隨時攞唔到永久居留，當英國政府收緊難民政策時，其他移民政策都可能會跟住嚟。如果更高嘅語言、收入要求成為申請永居嘅必要條件，唔少港人過去幾年花嘅金錢、時間同精力，好可能會化為烏有。
有人認為，英國政府「有義務」接收、照顧香港人，所以唔應該收緊移民政策，要保持BNO「5+1」現有政策，但事實係，當英國結束對香港嘅殖民式統治，英國同香港就再無關係；BNO「5+1」唔係歷史產物，而係喺香港黑暴時，英國政府為迎合「反中潮流」而推出嘅政治產物，事過境遷，英國政府高高舉起、輕輕放下，實在不足為奇。當反難民、反移民係英國社會嘅共識，即使BNO「5+1」之後政策冇大改，但改變唔到社會風氣，講真港人移民喺英國生活，都好難過得好。
收藏
取消收藏
分享
