【點新聞報道】不少人都聽過「英國人不喜歡沖涼」，但實際污糟邋遢的程度遠超想像。一名移民英國的港媽在網上發文直指，被英國人的衞生習慣震撼到，指從事護理工作的她，見好多英國的老人家不但抹身當沖涼，更用同一條面巾洗面同洗籮柚，更恐怖是有時條毛巾上面，仲會見到前一日遺留下的屎跡，直言完全接受唔到，「點解佢哋可以接受，用番呢條屎跡毛巾，再抹落自己塊面度」。
該名移英港媽在社交平台threads以「關於沖涼文化，我真係有啲迷思」為題發文，話自己和兒子對英國人究竟幾多日先沖一次涼，都有同樣的迷思，「佢（兒子）曾經同我講，佢個同學手指甲永遠圍晒黑邊，身上長期散發住一陣罨臭味，有時企喺佢隔籬，會以為自己企咗喺垃圾桶旁邊」。
起初，港媽以為兒子說法誇張，但直到她從事上門護理之後，才發現有些畫面，真係比想像中更加震撼。她指，當地好多老人家，都是簡單抹身就當沖涼，但令她最不能接受是「洗面同洗pat pat，用同一條面巾」。
港媽指出，當地老人家的衞生程序大概是：「抹完下面，掛起晾乾，第二朝拎返嚟洗面」。她活靈活現地描述「有時條毛巾上面，仲會見到前一日遺留下嘅屎跡，而佢哋係真心覺得冇問題」。港媽直言，每次拎起條毛巾，都需要鼓起極大勇氣，慨嘆「我真係唔明，點解佢地可以接受，用番呢條屎跡毛巾，再抹落自己塊面度」。
至於當地的護理員的衞生習慣亦不遑多讓，港媽指，「再講返同事，英國人大多數都習慣朝早沖涼，但我真係理解唔到，做Carer嘅，日日接觸屎尿同各種污糟嘢，點解放工之後唔即刻沖涼？」。
港媽質疑他們的衞生觀念，「乜佢哋唔覺得，做完成日嘢，會帶咗一身細菌返屋企咩？點解可以忍到第二朝先洗？」港媽正好相反，「放工嗰下唔即刻沖涼，連坐落梳化都會有罪惡感」。
英國香港文化和生活方式差異大，港媽分析指，「會唔會因為我哋香港人經歷過沙士、COVID，由細被教到返到屋企第一件事一定要沖涼洗頭，所以特別覺得呢啲情況好有問題？會不會？其實喺英國人眼中，香港人一放工就馬上沖涼，真係好奇怪？」
收藏
取消收藏
分享
