文/稀思路
因為勾結外國勢力、危害國家安全而被判囚20年嘅黎智英，案件已經審結，但餘波仍然未了，除咗外國勢力持續干預案件，黎智英嘅仔女，包括女兒黎采同兒子黎崇恩，就繼續四處流竄，搵外國政客幫手，試圖借助外力，向香港特區施壓「釋放黎智英」。最近，美國眾議院議長邁克·約翰遜（Mike Johnson）表示會邀請黎采，出席總統特朗普嘅國情咨文演講，稱黎采獲邀出席顯示出「美國確保黎智英獲釋嘅決心」，黎采覺得美國會救、救到黎智英？反正筆者就唔相信！
基於黎智英同英美政客嘅關係，所以外國勢力由黎智英被捕開始，基本上就冇停止過干預黎智英案，黎采獲邀出席特朗普嘅國情咨文演講，美國政客當然會講到「意義非凡」啦，邁克·約翰遜就聲稱，黎采具有「非凡勇氣」，「美國決心確保黎智英獲釋（America is determined to secure Jimmy’s release）」，仲話黎智英畢生致力於「香港民主」，因為「捍衛言論自由、公開反對中國」而被囚禁。
呢位眾議院議長，喺形容黎智英嘅時候，說得非常動聽，不過佢所講嘅都係假嘅，黎智英唔係因為捍衛自由而被捕被告，而係因為佢串連外國勢力，要求外國「制裁」香港官員，呢種係賣國、通敵行為，已經遠遠超出行使自由權利嘅界線，罪行放喺美國、英國以至其他五眼國家，相信都好難避開刑責。
黎智英請求外國「制裁」香港，公開表示自己「為美國而戰」，任何明事理嘅人，都知道黎智英係漢奸，而且係想傷害中國以至香港特區嘅漢奸，無論係用「自由」、「新聞工作者」、「爭取民主」等等藉口想為佢開脫，都改變唔到黎智英犯罪嘅鐵一般事實。依家黎采受邀去聽特朗普嘅國情咨文，就代表美國一定會將黎智英「救」出嚟？筆者覺得，呢啲只係美國政府同政客擺出嚟嘅政治姿態。
表面上，黎采受到重視，但喺美國嘅國家利益面前，黎智英、黎采以至黎崇恩，可能什麼都不是，讀者們可以睇下近期嘅國際新聞，早幾日白宮宣布，特朗普下月31日起訪華三天，其實過去一段日子，特朗普以至美國政府官員，基本上都係擺出一副好想特朗普順利訪華嘅姿態，甚至喺唔同方面放軟口氣，當特朗普本人都知道要同中國打好關係嘅時候，特朗普可能會做下樣畀人睇，但會動真格，先去破壞香港法治，再硬橋硬馬要中國、香港特區「釋放黎智英」咩？成件事黎采等人睇得好合理，但美國政府最關注嘅，只係自己嘅國家利益。
可能有人會質疑，黎采既然受到美國「高度重視」，美國政客又話會「救」黎智英，咁應該好重視黎氏一家嘅，筆者必須強調，棋子終歸係棋子，黎智英嘅作用，其實就係外國勢力用嚟搞事同抹黑中國嘅，依家黎智英被捕，外國政客只係借佢仔女把口，繼續用黎智英案件抹黑中國，真心認為美國「救黎智英」？真係認真你便輸了，依家黎采同黎崇恩，有少少似走緊其父親黎智英嘅舊路，筆者要溫馨提示下黎氏一族，呢條係末路，反中亂港，必有後果！
收藏
取消收藏
分享
